Nga Boldnews.al
Nurihan Seiti ka marrë rolin e “humoristes” në mbledhjet e Këshillit të Lartë të Prokurorisë. “Boldnews.al” zbardhi pak ditë më parë mbledhjen me dyer të mbyllura të KLP, në të cilën Seiti iu drejtuar kryetarit, Gent Ibrahimi se “për çdo dilemë që mund të ketë për aspektin penal, të më drejtohesh mua, pasi kam përvojë nga kjo fushë”.
Dhe, në fakt, anëtarja Seiti ka përvojë në çështjet penale, sidomos ato ku janë dënuar persona për ‘agjitacion e propagandë në periudhën komuniste”.
Pak muaj më parë, Partia Demokratike publikoi disa dokumenta gjyqësore, në të cilën Nurihan Seiti, në atë kohë prokurore, ka hetuar një shtetas për “agjitacion e propagandë”, i cili u dënua me 8 vjet burgim pasi, sipas akuzës, ishte shprehur në mbrojtje të Mehmet Shehut, i shpallur armik e poliagjent.
“Boldnews.al” po e risjell të plotë vendimin e gjykatës së Janarit 1989, për të kuptuar qartësisht se cila është “përvoja në aspektin penal” e juristes Nurihan Seiti, e cila sot është pjesë e trupës që do të sjellë “Drejtësinë e re”.
“Gjykata e Rrethit Fier, me pjesëmarrjen e prokurores Nurihan Seiti, mori në shqyrtim në seancë me dyer të hapura çështjen penale që i përket të pandehurit Ndue Kola, i datëlindjes 1920, me origjinë shoqërore fshatar i varfër, pensionist, i arrestuar më 27.07.1988, i akuzuar për ‘agjitacion dhe propagandë”
(…) Akuzat në ngarkim të tij provohen plotësisht, prandaj ai duhet të përgjigjet për to. Nga hetimi dhe gjykimi i kësaj çështjeje, del e provuar se i pandehuri Ndue Kola, me banim në fshatin Sheq të Fierit, është dënuar me 1 vit burgim në vitin 1946 për veprimtari armiqësore ndaj shtetit.
Qysh atë kohë e vazhdimisht, ky i pandehur jo vetëm nuk hoqi dorë nga rruga armiqësore, por me dinakërinë e tij është kamufluar, duke ekspozuar në opinion personin e tij si një element i lidhur ngushtë me Partinëe.
Edhe pse i tillë, i dënuar nga ligjet e pushtetit popullor, ai ka arritur deri sa të futet në Parti e pas një kohe është përjashtuar përsëri prej saj.
Në të vërtetë, ky armik i Partisë dhe i shtetit tonë socialist, gjatë gjithë jetës së tij ka ëndërruar e pritur përmbysjen e pushtetit popullor dhe këtë ai e priste kryesisht nga armiku dhe poliagjenti Mehmet Shehu, për të cilin ka nostalgji.
Duke mos patur besim te Partia, ky armik i betuar është përpjekur që me propagandën e tij armiqësore që ka zhvilluar, t’u mbushi mendjen të tjerëve se gjoja “Mehmet Shehu nuk ishte armik dhe se atë e asgjësoi “udhëheqja e Partisë” e në të njëjtën kohë ka folur, në disa raste, me simpati të veçantë për të. Këtë propagandë e ka bërë në vende, kohë e me persona të ndryshëm.
Kështu, i pandehuri Ndue Kola i është shprehur dëshmitarit Heqerem Dyrmishi se “..me heqjen e bagëtive nga oborret personale, u bë keq puna…Këtë faj ia ngopin Mehmet Shehut. Pse, një Byro Politike dhe një Komitet Qendror nuk kontrollonin dot një njeri…? Çfarë bën ata? Fajin e ka Byroja Politike e jo Mehmet Shehu…Ai ishte i zoti, shumë trim, ku shkelte ai nuk mbinte bar, por këta e nxorën armik. Po të ishte armik ai, e kishte asgjësuar që më parë Themeluesin e Partisë…”
Politika e jashtme e drejtë parimore që ndjek Partia, këtij të pandehuri i verbon sytë dhe me opinionin e tij përpiqet të helmatisë ndërgjegjen e të tjerëve për të krijuar tek ata urrejtje e pakënaqësi për vijën e Partisë dhe politikën e saj të jashtme që ndjek.
Në vijim të këtyre akuzave, të ngritura nga prokurorja Nurihan Seiti, gjykata e dënon të pandehurin Ndue Kola, me 8 vjet burgim.
