Gjykata ka lënë në burg 40-vjeçarin Roland Milo, i cili pranoi ekzekutimin e bashkëpunëtorit të tij, Sokol Rama, në trafikun e drogës.
Milo ka dalë sot para gjykatës ku është njohur me masën e sigurisë, ndërsa do të qëndrojë në burgun e Fierit deri sa të përfundojë gjykimi ndaj tij.
Milo, u arrestua në Vaqarr të Tiranës, ndërsa ka pohuar para oficerëve të policisë se ka kryer krimin pas mosmarrëveshjeve që ka pasur me Ramën në ndarjen e parave.
Si autori i krimit dhe viktima, prej dy vitesh bashkëpunonin me njëri tjetrin në vjedhjen e banesave, por edhe në trafikun e lëndëve narkotike.
Mësohet se konflikti mes tyre lindi për një shumë prej 350 euro, që autori dhe viktima duhej të ndanin mes tyre.
Prej rreth 3 javësh si Milo ashtu edhe Rama, ishin zhdukur ndërsa trupi i pajetë i këtij të fundit u gjet nga policia në automjetin e tij.
Polici ngriti dyshimet që vrasja ishte kryer nga shoku i viktimës, që u kap një ditë pas gjetjes së trupit të pajetë të të riut nga Tepelena.
Vrasja është kryer në kthesën e Piskovës, pranë Përmetit, e më pas Milo e ka hedhur makinën me trupin e pajetë në humnerën pranë fshatit Mbrezhdan të Këlcyrës, me qëllim fshehjen e vrasjes.
Roland Milo nga fshati Miçan i Përmetit njihet si një person problematik, sidomos për mashtrimet e tij, por para uniformave blu ai ka shprehur pendesë për vrasjen, duke thënë se situata i doli jashtë kontrollit dhe gjithçka e ka bërë në gjaknxehtësi e sipër, duke e qëlluar shokun e tij me kallashnikov.
“Nuk doja ta vrisja, por e humba logjikën dhe e qëllova pas një debati që patëm për një shumë parash, që duhet t’i jepja”, është shprehur 40-vjeçari para hetuesve.
Sokol Rama nga fshati Mamaj i Tepelenës, djalë i vetëm mes katër motrave, i rritur në një familje të varfër fshatare, u shpall i zhdukur në 5 shkurt, pas denoncimit të familjarëve të tij.
