Mjekët e spitalit të Durrësit po zhvillojnë një protestë kundër dhunës së ushtruar ndaj mjekut Gerald Kola.
Kola u godit nga pacientë teksa po ushtronte detyrën e tij në urgjencën e spitalit të Durrësit.
Ngjarja ka ndodhur dy ditë më parë, ndërsa lidhur me ngjarjen reagoi edhe ministrja e Shëndetësisë, Ogerta Manastirliu.
Gerald Kola mjeku i spitalit të Durrësit, u godit me tullë në fytyrë rreth orës 19:30 të mbrëmjes së të shtunës. Teksa përpiqej të ndante dy të dehurit që po ziheshin në ambientet e Urgjencës, mjeku roje mbeti i plagosur, fatmirësisht jashtë rrezikut për jetën.
“Ka tentuar roja për t’i nxjerrë dhe i janë kthyer rojes, ngaqë kanë qenë duke bërtitur ka ndërhyrë një pacient tjetër për të shuar sherrin dhe aty ka filluar sherri. Në atë kohë kanë qenë 3 mjekë që kanë ndërhyrë për t’i ndarë. Njëri nga familjarët ka dalë jashtë, ka marrë tullë dhe bisht fshesë dhe ka goditur njërin nga mjekët”, sqaroi ngjarjen drejtoresha e spitalit rajonal të Durrësit, Nadire Jani.
