“Iu thaftë dora atij që shet dhe blen votën”. Është ky mallkimi i shprehur në studion e Provokacijas nga Neritan Ceka, i cili shton se çdo popull ka qeverinë që meriton.
“Çdo popull ka qeverinë që meriton. Ne kemi qenë bashkë në lëvizjen e dhjetorit ku vumë në rrezik jetën, familjen, karrierën dhe jetuam për një popull që shet votën, por mallkim dhe iu thaftë dora atij që shet dhe blen votën, janë pjesë e një populli që nuk meriton demokraci. O është mallkim nga Zoti o nuk na i ka fajin njeri. Të huajt e shohin këtë si një mëkat gjenetik të shqiptarëve”, tha Ceka.
Problemet që kalon Shqipëria, Ceka i lidh edhe me ndërkombëtarët.
“Pse rrinë këta për rrogat, për makinat, për zyrat. OSBE është pjesë e problemit, jo pjesë e zgjidhjes, me qëllim që sa më keq të shkojnë zgjedhjet në Shqipëri aq më shumë do rrijë OSBE në shqipëri. Nuk ka mundësi që ai që zgjidhet numëron votat dhe OSBE e di që kjo metodë ndodh vetëm në Korenë e Veriut. Na trajtojnë si një vend i botës së tretë. Ne jemi para tyre në Evropë. Ne kur kishim teatër këta të osbe vareshin nëpër pemë e lyheshin me bojë të kuqe. Punët do shkonin më mirë sikur ndërkombëtarët të mos ishin kaq prezentë”.
Kam alergji nga ndërkombëtarët. Është historia ime që ka luftuar për votën e lirë, një vend me stabilitet pa institucione do shkojë në destabilitet. Mënyra si ndërhyjnë për të fiksuar figura, Rama nuk mund të zëvendësojë institucionet, Berisha nuk i zëvendësoi dot”, tha Ceka.
