Oresti Rexho dhe Arjan Hasani mbetën të vrarë si pasojë e një atentati të ndodhur në zonën e Ujit të Ftohtë në Vlorë, ndërsa është plagosur Armando Sulejmani, i njohur me nofkën Çipuri.
Burime nga policia lokale bënë të ditur se viktimat dhe i plagosuri po udhëtonin në të njëjtin automjet, kur i është prerë rruga nga një makinë, prej së cilës është qëlluar me breshëri automatike.
Burimet policore bëjnë të ditur se autorët kanë qëlluar mbi mjetin rreth 200 metra, përpara daljes në rrugë kryesore.
Mësohet se atentatorët janë larguar me shpejtësi nga vendi i ngjarjes, ndërsa policia ka gjetur të djegur një automjet në Babicë, që dyshohet se është përdorur në këtë atentat.
Një prej viktimave, Oresti Rexho, mësohet se ka qenë pronar i një lokali në Vlorë, ndërsa automjeti ku udhëtonin viktimat ishte në pronësi të Arjan Hasanit.
Ndërkohë i plagosuri Sulejmani ka qenë i dënuar më parë për vrasje dhe ishte pjesë e bandës së njohur të Gaxhait.
