Reali i Madridit fitoi në Amsterdam kundër Ajax dhe ka hedhur një hap gjigant drejt kualifikimit për në turin e ardhshëm në Champions League. Gjithsesi, festa e klubit madrilen është prishur nga kapiteni Sergio Ramos, i cili mori karton të verdhë në minutën e 89-të dhe do të mungojë në ndeshjen e kthimit, por jo vetëm kaq, rrezikon një dënim edhe më të rëndë.
Kjo për faktin se 32-vjeçari pas ndeshjes doli para gazetarëve dhe rrëfeu se e mori qëllimisht kartonin: “E vërteta është se e kisha në mendje kartonin, do të gënjeja nëse do të thosha që nuk e mora qëllimisht. Nuk po e nënvlerësoj kundërshtarin, nuk po them që jemi kualifikuar, por vendosa që më mirë të mungoj në ndeshjen e ardhshme, sesa të rrezikoj më tej”, tha Ramos, i cili në fakt u pendua shumë shpejt, sepse i komunikuan që një deklaratë e tillë bie ndesh me rregulloren e UEFA-s.
Në rastet kur një futbollist merr karton të verdhë qëllimisht, UEFA parashikon pezullim prej 2 ndeshjesh, ndaj Ramos më vonë u mundua të ndryshonte gjithçka, me një postim në Twitter: “Në një ndeshje ka shumë tension, vendimet duhen marrë për punë sekondash. Më vjen keq që nuk do jem me shokët e skuadrës për një ndeshje, nuk e mora qëllimisht kartonin e verdhë. Do jem në tribunë si tifoz, me shpresën se do jem në fushë në çerekfinale”.
