Gramoz Ruçi, në cilësinë e Kryetarit të Kuvendit të Shqipërisë, përshëndeti sot ratifikimin e protokollit për Maqedoninë e Veriut në NATO.
Kuvendi i Shqipërisë është vendi i parë që ratifikon protokollin, ndërsa në krye të tij ndodhet ish-ministri i fundit i Brendshëm i qeverisë komuniste.
Dikur PPSH, ku bënte pjesë edhe Ruçi, pavarësisht se ishte Sekretari i Parë në një rreth të vogël, e trajtonte NATO-n si armikun kryesor të Shqipërisë, që trajtohej si fanari ndriçues nga udhëheqja komuniste e kohës.
Por sot koha ka ndryshuar! Një paradoks shqiptar, kur një ish-zyrtar i qeverisë komuniste që drejtoi Shqipërinë deri në 1991, sot me një tjetër funksion të lartë, praktikisht nr 2 i shtetit shqiptar, përshëndet hyrjen e Maqedonisë në NATO.
Ruçi i përket politikanëve që pavarësisht ndryshimeve që ndodhën në vend, qëndroi një ndër politikanët më aktivë brenda së majtës shqiptare, shpeshherë duke u cilësuar edhe si “dora e hekurt” në Partinë Socialiste.
Për vite me rradhë ka mbajtur postin e Sekretarit të Partisë së Punës së Shqipërisë në Tepelenë dhe më pas u zhvendos në Tiranë, ku mori postin e Ministrit të Brendshëm, duke qenë edhe i fundit në këtë pozicion.
Pas postit të ministrit të Brendshëm, kohë kur ndodhi edhe ajo që njihet si masakra e 2 Prillit në Shkodër, Ruçi u përball me një tjetër provë të rëndësishme për karrierën e tij, drejtoi Kongresin e 10 të PPSH-së, atje ku ish-komunistët shqiptarë vendosën të shndërroheshin në socialist, pavarësisht se një pjesë e tyre vinin nga rradhet politike të PPSH-së. /boldnews.al/
