Në një dalje televizive për televizionin shtetëror, ministri i Jashtëm serb, Ivica Daçiç madje ka thënë se Kosova pësoi humbje në këtë mbledhje. Ai e konsideron fitore të madhe për Serbinë mbledhjen e fundit të Këshillit të Sigurimit të OKB-së, ku u diskutua për Kosovën.
“Për dy vitet e ardhshme, Kosova do të jetë temë diskutimi në OKB. Në mbledhjen e fundit të gjithë ishin njëzëri kundër taksës dhe formimit të Ushtrisë. Për Vlora Çitakun ishte surprizë e madhe kur dëgjuan se përfaqësuesit e SHBA-ve kërkojnë heqjen e menjëhershme të taksës”, ka thënë Daçiç.
“Presionet do të vazhdojnë, sepse Kosova nuk ka më çfarë të bëjë. Serbia nuk do ta vazhdojë dialogun pa heqjen e taksës, kjo nuk është një kusht, është logjikë”, ka shtuar ai.
Prej disa kohësh dialogu mes Kosovës dhe Serbisë është një fazë ngecjeje pas taksës së vendosur nga Qeveria e Kosovës për mallrat që vijnë nga Serbia.
