Todi Lera, 57-vjeçari i cili një ditë më parë qëlloi gruan me thikë duke e lënë të vdekur, e më pas veten, është me precedent të mëparshëm për dhunë në familje. Krimi ndodhi në apartamentin e çifit në katin e parë të një pallati në rrugën “Dervish Hekali”. Todi Lera u transportua me urgjencë në spital rajonal të Vlorës për mjekim dhe mësohet se është jashtë rrezikut për jetën.
Todi Lera, në fund të shkurtit 2017, u arrestua për dhunë në familje. Më konkretisht, pasi kishe dhunuar fizikisht bashkëshorten, Etleva Lera, të cilën e vrau një ditë më parë dhe vajzën.
Asokohe, policia njoftoi se dhuna ndaj gruas ndodhi në banesën e çiftit pas një konflikti për motive të dobëta dhe se Etleva, përfundoi në spital si pasojë e lëndimeve që i shkaktoi i shoqi.
Disa muaj më vonë, me 06 shtator 2017, ai u lirua nga gjykata e Vlorës, që e dënoi me shërbim prove.
Në vendimin e gjykatës thuhej se “Todi Lera kishte ushtruar dhunë fizike ndaj bashkëshortes së tij Etleva lera dhe vajzës A.Lera. Nga deklarimet e Etleva Lerës ka rezultuar se motivi i ushtrimit të dhunës ndaj saj nga bashkëshorti konsistonte në dyshimet e krijuara tek ai sa i përket marrëdhënieve bashkëshortore, fakt për të cilin Todi Lera i kishte kërkuar disa herë asaj të largoheshin dhe të jetonin në Tiranë. Por, Etleva kishte refuzuar duke mohuar dyshimet e krijuara tek bashkëshorti”.
Më tej, në vendim thuhet se “vajza A.Lera ka deklaruar se në familje ishte krijuar gjendje e rënduar psikologjike në ditën e ngjarjes në përpjekje e sipër që të ndalonte babain e saj, të pandehurin Todi Lera, është dhunuar fizikisht prej tij dhe në këtë kohë në banesë ka ardhur S.M. i cili është mjek dhe u ka dhënë ndihmën e parë”.
Edhe vetë Todi Lera ka pranuar faktin penal në ngarkim të tij por ka thënë se veprimet i kishte kryer në kushte të rënduara psikologjike.
Pas shqyrtimit të çështjes, gjykata e Vlorës vendosi dënimin e tij me 6 muaj burg, dënim ky që iu zbrit me 1/3 për shkak të gjykimit të shkurtuar. Por, edhe 4 muaj burg ai nuk i bëri pasi gjykata pezulloi ekzekutimin e vendimit me burg dhe e la në periudhë prove për 8 muaj me kusht që të mos kryejë vepër tjetër penale. Në vendimin e gjykatës argumentohej se Todi Lera “paraqet rrezikshmëri të pakët shoqërore”.
Pas krimit, edhe fqinjë të çiftit konfirmuan se prej kohësh, ata kishin konflikte mes tyre dhe se Todi e dhunonte të shoqen prej kohësh.
/Boldnews.al/
