Zanafilla e konfliktit të ndodhur mbrëmjen e së martës në Korçë, është te ngacmimet seksuale që 69-vjeçari G.Xh. i bënte fqinjës së tij.
Referuar dëshmive të dhëna në polici dhe hetimeve paraprake, burime nga blutë e qytetit të Korçës, bënë me dije se 69-vjeçari jetonte në ndërtesën e ish-konviktit e “Shkollës së Ndërtimit”, që shërben për strehimin e familjeve me probleme ekonomike e sociale. Aty, jetonte edhe 47-vjeçari A.H., bashkë me gruan dhe dy fëmijët.
Mbrëmjen e së martës, dy burrat janë konfliktuar pasi gruaja e 47-vjeçarit i tha të shoqit se ishte ngacmuar në mënyrë të përsëritur nga 69-vjeçari G.Xh., madje edhe në sy të fëmijëve.
Ngjarja
Një telefonatë rreth sherrit vuri në lëvizje policinë. “Është marrë një telefonatë ku është kërkuar ndihma e Policisë në lagjen nr 4 në Korçë, pasi një shtetas në gjendje të dehur po konfliktohej me një shtetas tjetër, duke sjellë shqetësim tek banorët”, njoftoi Policia.
Të njëjtat burime shtuan se: Menjëherë janë dërguar shërbimet e Policisë drejt adresës së dhënë, ku nga verifikimet ka rezultuar se shtetasi G.Xh, 69 vjeç, në gjendje të dehur, ishte konfliktuar për motive të dobëta me shtetasin A.H, 47 vjeç, të dy banues në këtë lagje duke u bërë shqetësim për banorët, ku shtetasi G.XH ishte larguar menjëherë për në banesë ku dyshohet se do merrte një armë zjarri.
Në momentin që shërbimet e Komisariatit Korçë janë drejtuar për tek banesa e tij, 69-vjeçari u ka drejtuar armën e zjarrit automatik, duke tentuar të qëllonte në drejtim të punonjësve të policisë, por arma u bllokua duke mos realizuar qitjen.
Akuzat
Policia ka neutralizuar autorin duke bërë arrestimin e tij në flagrancë për veprat penale “Vrasja e punonjësve të Policisë së Shtetit, mbetur në tentativë” dhe “Mbajtja pa leje dhe prodhimi i armëve dhe i municionit”. 69-vjeçari, rezulton i dënuar më parë për veprat penale “Vjedhja” dhe “Dhuna në familje”.
Në cilësinë e provës materiale u sekuestrua një armë zjarri automatik dhe 88 copë fishekë luftarakë, të cilat i posedonte pa leje. Materialet ndaj 69-vjeçarit i kaluan Prokurorisë pranë Gjykatës së Rrethit. /Boldnews.al/
