Vrasje e dyfshitë e nuses dhe vjehrrës brenda banesës së tyre në Progër të Devollit tronditi vendin ditën e djeshme.
Sot, detaje të reja janë zbardhur nga vrasja e Fatmira dhe Bukurie Bamit, të cilat u masakruan me një copë druri nga Ali Zili, bashkëfshatari i tyre.
Burimet bëjnë me dije se vrasja ka ndodhur 2 ditë para se të zbuloheshin trupat e tyre nga Policia dhe kryeplaku i fshatit, ndërkohë që autori qarkullonte i qetë, pa i rënë në sy askujt.
Por natën e vrasjes ishte larguar nga Progëri. Duke marrë një taksi duke shkuar në drejtim të qytetit të Korçës, duke përdorur si justifikim për rrobat e lara në gjak faktin se e ëma i ishte rrëzuar e se po shkonte tek ajo në spital. Me të mbërritur në Korçë, rrobat gjithë gjak ia kishte dhënë një endacaku për të zhdukur gjurmët e krimit të rëndë që kreu, por në fakt kishte harruar që në shtëpinë ku kishte kryer krimin, kishte lënë gjithçka duhej për ta identifikuar si autorin e vrasjes makabër.
Të dyja të moshuarat kishin ende në duar tufat e flokëve që i kishin shkulur 36-vjeçarit në përpjekje për t’i shpëtuar. Po ashtu, edhe duart e autorit “flisnin” për krimin. Ai ka pasur hematoma në duar, detaj që provon se ai i ka dhunuar edhe me grushte të dy viktimat. E më pas është larguar i qetë nga banesa e tyre.
Arrestimi i Ali Zilit u bë në shtëpinë e tij, në të cilën sipas vëllait të autorit, ishte kthyer rreth orës 5 të mëngjesit të së shtunës. Sipas tij, i vëllai ishte përdorues i pijeve alkoolike dhe njihej si person i dhunshëm, madje edhe vetë e kishte denoncuar në Polici. Për Policinë lokale motivi i ngjarjes mbetet grabitja, pasi i vëllai i autorit Gjergji, mohoi faktin se viktimat i kishin borxh për drutë që u kishte prerë në mal. Ndërkohë që autori deri më tani vetëm sa e ka pranuar vrasjen, por nuk ka ende detaje nga dëshmia e tij.
