Nga Boldnews.al
Seancë normale, ditë e qetë, pa protesta, pa tension të stisur apo të vërtetë. Jemi në Parlament, aty ku kuvendojnë shtatarët e vendit, në qeverisje apo opozitë. Falët e para nisin me përdhunues e përdhunim. Ngjarja në Kavajë, ku një 13-vjeçare ra preh e dhunës seksuale dhe shantazhit nga tetë të mitur, ishte zanafilla e një debati, që degjeneroi në fjalor të rëndë, akuza, fyerje dhe kërcënime reciproke, duke “përdhunuar” fjalorin e shqipes. Gjithçka më pas vijon me akuza: “Vratë katër njerëz në bulevard”.., “i keni duart me gjak”,.. kundërpërgjigjet janë: “Po mbron trafikantët, kriminelët, vrasësit dhe monstrat”. “A e din çfarë bën burri jot?”-pyet një tjetër?
Me kaq sa cituam fjalë për fjalë deputetë e ministra, është fjalor i moderuar për ta, sepse ka edhe më keq. “Ti nuk njeh ligj e Kanun, merr në gojë familjarët, po familjes dhe gruas time t’i hash atë që nuk thuhet”-deklaroi nga salla e kuvendit kryeministri Edi Rama të hënën e kësaj jave. “Ti që i merr gratë shokëve, t’i që akuzon babanë për përdhunim, incest dhe nuk njeh atësinë e fëmijës”-u kundërpërgjigj ish-kryeministri Berisha. Edhe çfarë ndodhi? Asgjë, dita nis sërish nga e para, po këta personazhe janë në krye të vendit, me qëllimin e vetëm, të kenë pushtet.
Akuzat vijojnë sa duket se personazhet janë në një kamp armiqsh, sa në çdo moment mund të shqyejnë shoshoqin. Po në rastin e parlamentarëve tanë nuk duhet të shqetësoheni, vetëm flasin, pasi në vetvete të gjithë kanë një qëllim, të kapin majat e qeverisjes dhe më pas katër vite parajsë fiskale në të ardhura, privilegje, arrogancë dhe dëlir.
Për të arritur deri aty, mbajnë një komb të gjithin nën tension, për ta shtrirë agresivitetin nga maja e piramidës drejtuese, deri poshtë në shoqëri. Vetëm në këtë mënyrë nuk i lenë njerëzit të mendojnë qetë. Tensioni dhe akuzat u shërbejnë luginisë së “ujqërve të politikës”.
Paradoks! Janë vetë elita politike që kur shoqëria reagon dhunshëm bëhet predikuese e mirësisë, e paqes dhe kap rolin e nënës së mirë që i dhimbsen “fëmijët popull”. Nëse të rriturit, aq më shumë prindër janë tifozë të pervesitetit Parlament, të paktën mbani fëmijët larg nga ekrani. AMA (Autoriteti i Medias Audio Vizive), nuk ka marrë masat për të detyruar mediat të venë logon të paktën +16 çdo të hënë dhe enjte ku kuvendojnë burrat dhe gratë e shtetit.
