Gazetarja e Klodiana Lala, e cila është autorja e investigimit të publikuar nga BIRN dhe “Zëri i Amerikës”, për shit-blerjen e votave, mbrëmjen e sotme u shpreh se po hetohet penalisht nga Prokuroria pas shkrimit të saj investigativ.
Ajo tha në një intervistë për “A Show”, se ndonëse ajo po hetohej penalisht, pasi tregoi për lidhjen dhe ndikimin e krimit të organizuar në procesin zgjedhor në Shqipëri, lidhje të cilën ajo tha se e kishte vërtetuar përmes dokumenteve të prokurorisë, sërish nuk do ta tregojë burimin e saj.
“Prokuroria ka nisur një hetim penal por nuk më shqetëson fare kjo gjë. Hyj në atë kategori gazetarësh që kanë luftuar fort për të gjetur një dokument zyrtar jam e qartë në atë që kam shkruar prokuroria ka punën e saj por para se të hetojë gazetarët për burimet që e them me bindje të plotë nuk i nxjerr asnjëherë do të duhet të hetojnë ato dhjetëra mijëra dosje që flenë në Prokurori. Si mundet një prokuror të më kërkojë mua si gazetar llogari për një burim apo shumë burime që s’kam për t’i treguar asnjëherë”, – tha Lala.
