Edhe pse duket si një pasazh filmash, një mesazh i shkruar në një letër brenda një shisheje qelqi është gjetur në brigjet italiane e më pas ka përfunduar duke bërë xhiron në rrjetet sociale.
Italianja që gjeti shishen buzë detit nuk e kishte menduar kurrë se mesazhi brenda asaj shisheje do t’i përkiste një gruaje shqiptareje. Duke mos e njohur gjuhën ajo e publikoi letrën në Facebook nga ku ka marrë dhjetra komente edhe nga shqiptarët, të cilët me shumë dëshirë ia përkthyen zonjës letrën në fjalë.
Mesazhi i gruas që kishte shkruar letrën ishte po aq paqësorë sa edhe shëtitja buzë detit. Letra ishte shkruar 2 vite më parë, dhe gruaja i lutej Zotit të bekonte familjen e saj dhe të dashurit e zemrës duke i kërkuar gjithashtu edhe bekimin për tu bërë nënë.
“Një shëtitje në det… e bëjmë çdo të dielë… papritmas ne shohim atje, në valë, një shishe në shkëmbinj… dhe këtu vjen surpriza… brenda mbante një letër.
Ka një datë, 01.01.2017, ka qenë dy vjet në det… tani ne vetëm duhet ta përkthejmë atë për të kuptuar se kush dëshironte të dërgonte një mesazh kujt…”, shkruan italianja.
