Partia Demokratike, përmes Departamentit Anti-korrupsion, denoncoi sot dhënien me konçension të administrimit dhe vjeljes së tarifave të parkimit në Tiranë. Sipas partisë më të madhe të opozitës, ky konçension do t’i jepet Besnik Sulajt.
“Vendimi i Këshillit Bashkiak Tiranë vendosi të japë me koncesion administrimin dhe vjeljen e tarifave të parkimit në Tiranë.
Një vendim i tillë e ka zanafillën jo në rritjen e eficencës së shërbimit, apo mashtrimet bajate që serviri Bashkia Tiranë. Në origjinë të një vendimi të tillë qëndron pazari i ri me klientin e vjetër, Beson e Taiwan-it.
Që në prill të 2018, Partia Demokratike e ka denoncuar shoqërinë “Pay and Go”, si pjesë e rrjetit të shoqërive offshore të Besos së Taiwan-it.
Nuk përbën sot asnjë suprizë që përveç sektorit të hidrokarbureve, sektorin bankar, sot ta shohim Beson e koncesionit të parkimit te Parku Rinia, të përfshirë edhe në vjeljen e tarifës së parkimit në të gjithë Tiranën”, thuhet në reagimin e Departamentit Anti-korrupsion pranë PD.
