Elton Çiço u vra nga 30 vjeçari Jani Alia, i cili u ndihmua nga Renato Milloshi, djali i ish-kreut të Partisë Komuniste, Hysni Milloshit.
Policia e Tiranës ka mundur që të zbardhë ngjarjen e disa javëve më parë në një lokal pranë stadiumit “Dinamo” në Tiranë, ku mbeti i vdekur Elton Çiço. Nga hetimet e deritanishme, rezulton se Elton Çiço dhe Jani Alia kanë qenë në burg së bashku në Greqi. Alia ka qenë i dënuar me 18 vite burg për vrasje, por ka kryer vetëm 10 vite pasi është arratisur, shkruan “Gazeta Shqiptare”.
Gjatë kohës që Alia vuante dënimin, në të njëjtin burg ka qenë edhe Elton Çiço, i dënuar për drogë. Gjatë një sherri mes tyre, Çiço e plagosi me thikë Jani Aliajn. Pas kësaj, konflikti vazhdoi edhe jashtë burgut në Shqipëri.
Më 10 janar 2016, në rrugën e Kavajës në Tiranë është tentuar të vritet Jani Alia, pasi është qëlluar nga një makinë. Më 25 prill 2016, pranë Urës së Lumit në Gjirokastër, Alia mbeti i plagosur me plumb në dorë pasi disa të shtënave.
Në të dyja këto raste, i dyshuar ishte Elton Çiço, i cili ishte marrë disa herë në pyetje, por nuk ishte arrestuar. Historia përfundoi me ekzekutimin e Çiços, i cili mbeti i vdekur me dy plumba në kokë.
