Nga Boldnews.al
Rexhep Rraja, djali dhunues i deputetit të Partisë Socialiste të Krujës, Rrahman Rraja, ka lënë pasditen e së Enjtes qelinë e paraburgimit, pak parë Vitit të Ri, saktësisht si e kishte parashikuar “Boldneës.al” në një shkrim të rreth dy muajve më parë.
Rexhep Rraja u akuzua për veprën penale të “Përndjekjes” ndaj ish-të dashurës së tij, Xhisiela Maloku, pavarësisht se e dëmtuara e kishte akuzuar fillimisht për “dhunim dhe armëmbajtje pa leje”. Ngjarja, për të cilën akuzohet Rexhep Rraja ka ndodhur në mesin e Korrikut 2018. Ai u dënua nga gjykata e Krujës me 1 vit burgim, i cili u konvertua në shërbim prove.
Ngjarja u bë e njohur për publikun rreth dy muaj më pas, vetëm pas kallëzimit të ish-nënkomisar Emiljano Nuhu. Oficeri i policisë, në një letër drejtuar krerëve më të lartë të shtetit, deklaroi se u kërcënua në zyrën e tij nga kryebashkiaku i Krujës, Artur Bushi, në prani të kreut të grupit parlamentar të Partisë Socialiste, Taulant Balla.
Denoncimi publik i oficerit Nuhu detyroi policinë dhe Prokurorinë, të drejtuar në atë kohë nga Fatmir Xhafaj dhe Arta Marku, për të reaguar, duke arrestuar Rexhep Rrajan. Por arrestimi dhe sidomos ngritja e akuzave ndaj tij ishte shumë e dyshimtë. “BoldNeës.al” e paralajmëroi lirimin e tij para Vitit të Ri, në një shkrim të datës 2 Tetor 2018, me titull: “Loja ‘Xhafaj-Marku’, ja si po i japin amnisti djalit dhunues të deputetit Rraja”
Në atë shkrim, “BN”, shkruante:
“….Por, si përherë, “djalli fshihet në detaje”, sidomos kur dhunues apo shkelës të ligjit janë familjarë të pushtetarëve socialisë.
Policia, në njoftimin e saj zyrtar për rastin konkret, deklaron se “ka zbatuar vendimin e gjykatës për arrestimin e Rexhep Rraja, i dyshua për veprën penale “Përndjekja”. Për këtë vepër e ka referuar policia e Fatmir Xhafaj në Prokurori dhe për këtë vepër e ka dërguar çështjen edhe Prokuroria e Arta Markut në Gjykatë.
Pra, nuk ka akuzë as për dhunë fizike, përfshirë edhe djegien me cigare e hematoma të shumta. Nuk ka akuzë as për armëmbajtje pa leje, pasi denoncuesja deklaron se dhunuesi i saj e ka kërcënuar me pistoletë si jashtë, ashtu edhe në ambjentet e Postës Policore të Fushë-Krujës.
Natyrisht, për veprën penale të armëmbajtjes, askush nuk mund ta akuzojë sot, pasi nuk mund të provohet që Rexhep Rraja ka pasur në dorë armë para dy muajsh. Për këtë vepër aim und të arrestohej në flagrancë, nëse do të kishte pasur vullnet policor që në momentet e para.
Gjithësesi, duke u rikthyer tek vepra për të cilën akuzohet zyrtarisht Rexhep Rraja, “Përndjekja”, Kodi Penal parashikon një dënim gjashtë muaj deri në 4 vjet burgim. Pra, ekzistojnë të gjitha mundësitë që Rexhep Rraja të marrë dënimin edhe 6-mujor, për shkak të “sjelljeve të mira” dhe pranimit të autorësisë së veprës penale. Nëse e pranon “përndjekjen” para gjykatës, ai mund të përfitojë edhe uljen me 1/3 e dënimit, pra të qëndrojë përfundimisht pas hekurave 4 muaj. Por, nëse mbahet parasysh se një ditë në paraburgim konsiderohet 1 ditë e gjysëm burgim, atëherë, me llogari të thjeshtë, Rexhep Rraja mund të jetë pranë familjes shumë kohë para festës së Vitit të Ri.
