Bashkia e Tiranës vazhdon që të rëndojë xhepat e qytetarëve. Pas rritjes së çmimit të biletës së urbanëve, dhe heqjes nga e drejta për të udhëtuar pa biletë e punonjësve të bashkisë dhe punonjësve të policisë së shtetit, në autobusët e linjave në kryeqytet është vendosur një afishim tjetër.
Sipas këtyre njoftimeve, “fëmijët mbi moshën 6-vjeç, duhet të presin biletë”. Tashmë, me këto njoftime, fatorinot duhet që të gjejnë edhe moshën e saktë të këtyre fëmijëve. Nëse një fëmijë është i zhvilluar fizikisht, por është nën moshën 6-vjeç, fatorinot do i kërkojnë biletë.
Tashmë mbetet për të parë sesi do të veprojnë mbledhësit e lekëve në autobusët e linjës në kryeqytet, të cilët gjëja e vetme që u ngelet për të bërë është që tu kërkojnë fëmijëve të klasave të para, të dyta e me radhë, 40 lekë të vjetra për çdo udhëtim, ose në të kundërt të pajisen me një abone e përgjithshme, e cila ka një çmim prej 16 mijë lekësh të vjetra në muaj.
