Skënderbeu është duke vuajtur jo vetëm prej rezultateve negative, por edhe ankthin që po i shkakton pritja e vazhdueshme e përgjigjes nga CAS-i.
Pritej që Gjykata e Arbitrazhit Sportiv në Lozanë të caktonte një datë në fund të tetorit, pastaj pati zëra për nëntor dhe dhjetor.
Por, kur viti po shkon drejt mbylljes, vendimi për dënimin 10-vjeçar të dhënë nga UEFA nuk po jepet ende.
Edhe pse bardhekuqtë kanë apeluar, presin fillimisht që t’u caktohet një datë për nisjen e gjyqit.
Megjithatë, edhe fillimi i 2019-ës nuk sjell asnjë lloj shprese.
CAS ka publikuar në faqen e vet datat për gjyqet që do të mbahen deri më 15 shkurt, por asgjëkund nuk rezulton çështja “Skënderbeu”.
Kjo detyron kësisoj jo vetëm klubin, por edhe lojtarët që të presin edhe dy muaj të tjerë derisa t’u vijë radha.
Kujtojmë se pakti fillestar që Ardjan Takaj bëri me lojtarët ishte që të prisnin deri në dhjetor dhe më pas do të rinegocionin për kontratat. Por me CAS-in që po i mban “peng”, mbetet për t’u parë se çfarë do të ndodhë me të ardhmen e tyre.
Korçarët po përgatitin ende dosjen e tyre të apelimit të vendimit dhe po finalizojnë kundërshtimin e pikave ku UEFA ka bazuar dënimin.
Në të njëjtën kohë, bardhekuqtë janë duke mbajtur korrespondenca me panelin e CAS-it, ku shpesh dërgojnë materialet e kërkuara për plotësimin e dosjes.
