Protesta e studentëve ka hyrë sot në ditën e saj të tretë, ndërsa në shumicën prej fakulteteve të Tiranës dhe të vendit nuk do të zhvillohet mësimi as sot.
Studentët janë grumbulluar rreth orës tetë e 30-të nëpër godinat e fakulteteve dhe kanë nisur marshimin drejt Ministrisë së Arsimit pranë Rrugës së Durrësit.
Fillimisht pati raportime se protesta do të zhvendosej përpara kryeministrisë, po mesa duket studentët janë tërhequr nga ky vendim dhe fillimisht ata do të mblidhen përpara Ministrisë së Arsimit.
Po ashtu protesta ka nisur dhe në Universitetet e rretheve si në Elbasan, Shkodër, Durrës dhe Vlorë.
Ditën e djeshme ministrja e Arsimit Lindita Nikolla deklaroi tërheqjen nga pika 4 e VKM-së që ishte ajo e pagesës së tarifave shtesë për provimet e mbartura, mirëpo për studentët ka ende shumë kërkesa të paplotësuara.
Ndërkohë që dje studentët e Universitetit Bujqësor të Tiranës kanë shtuar disa kërkesa në drejtim të Ministrisë:
Student Economic Forum si një organizatë jo-fitimprurëse e themeluar në vitin 2014 nga një grup studentësh dhe pedagogësh të UBT-së, mbështet fuqimisht kauzat e studentëve të ngritura në protestë.
Studentët, përfaqësues të forumeve dhe klubeve studentore të UBT-së, përfaqësues të 5 fakulteteve, Fakultetit të Ekonomisë dhe Agrobiznesit; Fakultetit të Bujqësisë dhe Mjedisit; Fakultetit të Bioteknologjisë dhe Ushqimit; Fakultetit të Mjekësisë Veterinare; Fakultetit të Shkencave Pyjore kanë vendosur si më poshtë:
1- Bojkotin e mesimit për datën 7/12/2018;
2- Vazhdimin e protestave para fakulteteve (8:30) dhe Ministrisë së Arsimit (10:00);
Ky vendim është marrë pasi struktura drejtuese e SEF (50 studentë) dhe klubet studentore të UBT-së (30 studentë) e kanë miratuar unanimisht me votë të lirë;
Kërkesat e studentëve të Universitetit Bujqësor të Tiranës:
1- Paisja e të gjithë studentëve me Kartën e Studentit brenda vitit akademik 2018 – 2019;
2- Rritja e buxhetit për arsimin me 8% të GDP-së, buxheti për vitin 2019;
3- Reduktimi tarifës me 30% për vitin akademik 2018 – 2019;
4- Reduktimi tarifes me 50 % për vitin akademik 2019 – 2020;
5- Arsim publik falas për vitin akademik 2020 – 2021;
6- Përmirësimi i kushteve të konvikteve të Universitetit Bujqësor të Tiranës;
7- Mbështetja e aktiviteteve dhe projekteve të studentëve me një fond të veçantë, nivel fakulteti;
8- Mbështetje e studentëve për kërkime shkencore;
9- Mbështetje e studentëve të doktoraturës me fonde për kërkimin shkencor;
10- Rritja nga 10% në 40% e peshës totale të votës së studentëve për të zgjedhur kandidatët për dekan/rektor, dhe rritja e përfaqësisë së studentëve në senatin akademik me 20%.
Këto janë kërkesa të panegociueshme të cilat studentët e Universitetit Bujqësor të Tiranës i quajnë të shenjta.
Ne jemi të gatshëm të luftojmë për t’i fituar këto sfida një e nga një, njësoj si studentët e Bashkimit Europian para 30 – 40 vitesh nëpërmjet lobimit, advokimit dhe protestave në vendet e tyre.
Jemi të gatshëm të diskutojmë me këdo që merrë përsipër të zgjidhë 10 kërkesat e studentëve të UBT-së.
Për Shqipërinë që i do dhe i mbështet studentët!
