Mazhoranca nuk ka rënë dakord për të rritur kufirin e pagave të pa tatueshme nga 300 mijë lekë të vjetra në 400 mijë lekë. Propozimi ishte bërë nga deputetët socialistë Erion Braçe dhe Blerina Gjylameti.
Por, teksa vendimi duhej marrë në mbledhjen e sotme të komisionit të Ekonomisë, ideja nuk është diskutuar fare, çka do të thotë se propozimi nuk është marrë parasysh. Mbledhja e paradites u shty për pasdite dhe atë e drejtoi sekretari i Komisionit, Anastas Angjeli.
Por, deputetja e Partisë Demokratike thotë se është shkelur ligji në këtë rast, pasi komisionin mund ta drejtojë vetëm kryetari dhe nënkryetari.
Tabaku: “Sot Komisioni Ekonomisë ka miratuar dokumentin me te rendesishem te shtetit ne shkelje te ligjit dhe rregullores se parlamentit. Sot mbledhja e komisionit eshte drejtuar nga sekretari i komisionit.
Dy jane dokumentat me te rendesishem te nje qeverie programi dhe buxheti i shtetit. Kur buxheti i shtetit miratohet ne shkelje te ligjit e te rregullores a ka me moral te qendroje nje qeveri.
Keta qe shkelin kushtetuten, cdo ligj keto qe e kane bere lecke cdo VKM sot kane shkelur me te dy kembet dhe vete parlamentin. A ka me vend per opoziten ne keto institucione?
Ministri i Financave i pari dhe i dyti Kryeministri sot kane shkelur parlamentin me te dy kembet per një nga dy dokumentet me te rëndësishme te një qeverie!”
Nënkryetari i komisionit të ekonomisë i përket opozitës, e cila ka bojkotuar Parlamentin, ndërsa kryetari është Erion Braçe, i cili ka refuzuar me sa duket drejtimin e komisionit për të miratuar nen për nen paketën fiskale dhe buxhetin e vitit të ardhshëm.
Vet Braçe u bë pjesë e mbledhjes në mes të seancës, duke votuar disa herë kundër. Deputeti Braçe votoi kundër projektligjit mbi të ardhurat dhe kundër përjashtimit nga TVSH të imputeve bujqësore.
Komisioni i mbylli diskutimet duke votuar në tërësi buxhetin dhe paketën fiskale, të cilat të hënën do të shqyrtohen në seancë plenare.
