Klement Balili i ka shpëtuar policisë. Ndërsa blutë ishin të sigurt sot, se do e gjenin në shtëpi Balilin, kur shkoi për ta shoqëruar, ata nuk kanë mundur ta gjejnë.
Dyshohet se dikush e kishte lajmëruar atë më parë, aq sa të “sakrifikonte” edhe një intervistë për të cilën ishte thirrur dhe t’i ikte policisë.
Kur shkoi policia në banesën e tij, ai nuk ndodhej aty, ku kishte raportuar më herët se do të qëndronte deri në pritje të hetimeve.
Policia ushtroi kontroll në banesën e Balilit në Delvinë, por nuk u gjet asnjë gjurmë e tij. Madje dhe familjarët deklaruan se nuk kishin dijeni se ku mund të ishte. Burime të sigurta policore njoftuan se Balili ka mundur t’i shpëtojë vëzhgimit, ndërsa po kërkohet në fshatrat përreth Delvinës, si edhe në qytetin e Sarandës. Pavarësisht se për të ende nuk ka një fletë arresti ndërkombëtare, ai u njoftua se ishte nën vëzhgimin policor.
