TIRANE – Teksa është dita e 15 e protestës së tyre, banorët e Unazës së Re në Tiranë kanë nisur marshimin në rrugë ndërsa po afrohet afati për shembjen e banesave të tyre. Banorët janë nisur sot drejt zonës së sheshit “Shqiponja”, ndërsa kanë hedhur fishekzjarrë e shashka.
Ata kërkojnë dëmshpërblim dhe jo qira 3 vjeçare siç ka paralajmëruar qeveria. Me këtë protestë është bashkuar dhe opozita me anë të deputetëve, Flamur Noka e Klevis Balliu.
Janë 317 banesa që do të shemben në kuadër të ndërtimit të segmentit të unazës së madhe.
Më herët banorët bllokuan sërish rrugën tek Astiri. “Nuk ka asnjë fije trasnparencë, as nga qeveria as bashkia, ne sikur jemi geto afrikane, jo qytetarë të Tiranës. Edhe avokatja e popullit e nxorri blof qeverinë në shumë pika,” tha një banor.
“Qeveria edhe mund të na terrorizojë, por ne me trupin e jetën tonë do i mbrojmë banesat,” u shpreh ai.
