Kreu i departamentit të rendit dhe sigurisë në PD, Enkeleid Alibeaj denoncoi ministrin e Punëve të Brendshme Saimir Tahiri se ka biseduar në telefon me Emiljano Shullazin para se ai të arrestohej dhe i ka garantuar se më tej do të lirohej.
Në një dalje për mediat Alibeaj tha se Tahiri ka folur me Shullazin përmes telefonit të nëndrejtorit të policisë së Tiranës Ermal Muça.
Ai hodhi akuza ndaj këtij zyrtari të policisë si të lidhur me veprimtari të paligjshme që bëhen nën “bekimin’ e ministrit të Brendshëm. Në këtë linjë, Alibeaj i bëri thirrje prokurorisë të marrë pamjet e sigurisë të dy muajve të fundit në lokalin ku ndodhi vrasja e Elton Çiços në Tiranë.
“Pothuajse çdo natë Ermal Muça dhe Qebini i doganave ishin në shoqërinë e viktimës. Dhe të gjitha këto lidhje përfshijnë Shullazin e të çojnë tek Tahiri.
Eshtë kjo arsyeja pse arma dhe telefoni i viktimës u morën natën e krimit. Sepse arma dhe sidomos telefoni zbulojnë lidhjet me krerët e policisë dhe janë provë e dëshmi e trafiqeve të drogës”, tha Alibeaj.
Deklaratë e kreut të departamentit të Rendit dhe Sigurisë, Enkelejd Alibeaj
A ka biseduar Saimir Tahiri me Emiliano Shullazin, përpara ndalimit të tij nga policia?
A e ka garantuar Tahiri, Shullazin, se thjesht do të shoqërohej do të pyetej për kërcënimin e kandidatit per rektor, e më pas do lihej i lirë?
Të gjitha të dhënat tregojnë se kështu ka ndodhur.
Pakti u prish, sepse prokuroria urdhëroi arrestimin për akuzat e gjobvënies e kanosjes, pas punës disa mujore që kishte bërë për sigurimin e provave, sigurisht pa dijeninë e Tahirit.
Burime serioze, oficerë që janë në dijeni dhe që kanë qenë prezentë në aksion, dëshmojnë se Sajmir Tahiri ka folur me Emiliano Shullazin përmes telefonit të nëndrejtorit të policisë së Tiranës, Ermal Muça.
Ky funksionar i policisë rezulton të jetë një nga personat e besuar për shumë paligjshmëri e trafiqe që bëhen me dijeninë dhe bekimin e Tahirit.
Nëse prokuroria merr pamjet e dy muajve të fundit të lokalit ku ndodhi ekzekutimi i Elton Çiços, do të shohë se pothuajse çdo natë Ermal Muça dhe Qebini i doganave ishin në shoqërinë e viktimës. Dhe të gjitha këto lidhje përfshijnë Shullazin e të çojnë tek Tahiri.
Eshtë kjo arsyeja pse arma dhe telefoni i viktimës u morën natën e krimit. Sepse arma dhe sidomos telefoni zbulojnë lidhjet me krerët e policisë dhe janë provë e dëshmi e trafiqeve të drogës.
Ky është pra drejtimi që i bëhet policisë së shtetit, inkriminimi i saj në pikat kryesore. Ky është shteti kriminal, ku Edi Rama e ministri i Brendshëm janë një me bandat, bëjnë pazare, ofrojnë siguri e paprekshmëri për to.
Ndaj jeta e qytetarëve sot është më e pasigurtë se kurrë, droga ka mbuluar vendin, dhe trafikantët e bandat sundojnë kudo.
