Nga Boldnews.al
Pak orë pasi njoftoi me një cicërimë në Twitter se pranoi dorëheqjen e ministrit të Brendshëm, Fatmir Xhafaj, kryeministri Edi Rama u shfaq të Lushnje, në një takim për anëtarësimet e reja në Partinë Socialiste.
Nuk duket aspak rastësi që Rama shfaqet në këtë qytet, i cili është përfaqësuar në Parlament dhe si degë lokale e Partisë Socialiste nga Arben Çuko, i cili tashmë u arrestua në vijim të një operacioni gjysmak Fatmir Xhafaj-Arta Marku, zhvilluar fundjavën e kaluar.
Arben Çuko, deputet në legjislaturën 2013-2017 dhe më pas Drejtor i Burgjeve deri në shtator 2018, u arrestua pak ditë më parë, në akuzën për korrupsion. Ish-deputeti u arrestua në vijim të një operacioni të paralajmëruar më parë nga Fatmir Xhafaj. Pra, ishte e qartë se ministri i Brendshëm i dorëhequr mëngjesin e së Shtunës, ishte plotësisht në dijeni se në pranga do të binin si Çuko, ashtu edhe ish-deputeti i Lezhës, Arben Ndoka, të dy produkte politike të Edi Ramës.
Arrestimet e dy ish-deputetëve u lexuan politikisht si një presion që Xhafaj po i bënte Edi Ramës, duke u përcjellë gjithashtu mesazhin se ai, nëpërmjet Policisë dhe Arta Markut të Prokurorisë, mund të vendoste prangat në duart edhe të bashkëpunëtorëve të tjerë të kryeministrit.
Pas operacionit “të suksesshëm” të fundjavës së kaluar, Xhafaj bëri sërish lajm, kësaj radhe me “dorëheqjen” e tij. Edi Rama duket se nuk e ka pranuar aspak faktin që Xhafaj po merrte përsipër goditjen e bashkëpunëtorëve të tij, njerëzve me influencë në zona të ndryshme zgjedhore, siç janë edhe Lezha e Lushnja.
Ndaj, me artin e marrëdhënieve me publikun, Rama u shfaq të shtunën në Lushnje, në një takim në dukje rutinor. Por, duket qartë se mesazhi është tjetërkund-arrestimi i lushnjarit Arben Çuko nuk është vepër e tij, por e ministrit të tij të Brendshëm, i cili dha “dorëheqjen” pak orë para se Rama të takonte socialistët lushnjarë.
Nuk do të jetë aspak çudi që, në ditët e ardhshme, kryeministri dhe kryetari i Partisë Socialiste, Edi Rama, të zhvillojë një takim me strukturat lokale të PS në Lezhë. Takimi i mundshëm do të jetë për të përcjellë sërish të njëjtin mesazh-që Arben Ndokën nuk e arrestoi ai, por ish-ministri i tij, i cili u dorëhoq.
