Mesfushori i Borussia Dortmund, Ilkay Gundogan, nuk do të marrë pjesë në Euro 2016 për shkak të një dëmtimi të pësuar në gju gjatë një seance stërvitore. Lajmi është bërë i ditur nga vetë klubi gjerman. 25-vjeçari nuk do të jetë në dispozicion të kombëtares gjermane, që synon të përsërisë në Francë suksesin e arritur në Kupën e Botës para dy vitesh.
Ky dëmtim do ta detyrojë lojtarin të mungojë edhe në finalen që do të zhvillohet mes Bayern Munich dhe Dortmund me 21 maj në “Olympiastadion”. Dortmund ka informuar tifozët nëpërmjet këtij mesazhi në Twitter: “Sezon i përfunduar! Gundogan ka pësuar një dëmtim në gju gjatë stërvitjes”. Futbollisti do të mungojë edhe në dy ndeshjet e fundit të këtij sezoni të Bundesliga-s kundër Frankfurt dhe Koln, teksa matematika mban Dortmund akoma në garë për të fituar titullin, duke parë se verdhezinjtë janë 5 pikë larg kryesuesve të Bayern. Gundogan ka luajtur 36 ndeshje në të gjitha kompeticionet në këtë sezon, duke realizuar dy gola dhe duke dhënë katër asiste.
