Të paktën 5 persona kanë humbur jetën nga përmbytjet e vrullshme në zonën jugore të Audes në Francë. Në pak orë gjatë natës u regjistruan reshje shiu sa në disa muajt të mbledhur së bashku, tha prefekti i qeverisë lokale të hënën.
Helikopterët e shpëtimit po prisnin përmirësimin e motit para se të fillonin operacionet e shpëtimit. “Ne kemi njerëz të bllokuar në çati. Do të duhet të përdorim helikopterë për t’i evakuuar ata, sepse nuk mund t’i arrijmë me anije, duke pasur parasysh forcën e ujit. Është shumë e rrezikshme, “tha ai.
Ndër zonat më të prekura ishin fshatrat Conques-sur-Orbiel dhe Villardonnel, ku niveli i ujërave kapi dritaret e kateve të para të disa shtëpive. Vërshimet e papritura goditën pa paralajmërim. Të paktën një viktimë u zhduk nga ujërat ndërsa flinte.
Nivelet e ujit pritet të vazhdojnë të rriten në zonë të hënën, me parashikimin për reshje në pjesën e parë të ditës. Shkollat në zonën Aude u mbyllën dhe banorët u paralajmëruan të qëndronin në shtëpi.
