Liga e Kombeve është një kompeticion krejtësisht i ri që vë përballë skuadrat evropiane në një skemë të krijuar për të shmangur miqësoret e padobishme ku shpesh lojtarët më të mirë i bënin bisht, ose nuk impenjoheshin. E së fundmi, ka pasur edhe një ndryshim të ndarjes së të ardhurave. UEFA ka përditësuar të dhënat dhe ka bërë me dije se skuadrat do të përfitojnë më shumë nga sa ishte përcaktuar fillimisht. Nëse në fillim lakohej se Shqipëria përfitonte 750 mijë euro në Ligën C, do të arkëtojë 1 milion e 500 mijë euro, nëse lënë pas Skocinë dhe Izraelin. Për Kosovën në Ligën D, përfitimet vlerësohen përafërsisht 1 milion euro në rast se ia dalin që të ruajnë kreun në grupin e tyre.
Nga ky kompeticion do të ketë 4 skuadra që do të fitojnë të drejtën të luajnë në Europianin e vitit 2020, për t’iu bashkuar 20 skuadrave të tjera që do të kualifikohen me sistemin tradicional të ndeshjeve eliminatore. Nëse një skuadër kualifikohet përmes Ligës së Kombeve për në Evropian, por gjithashtu siguron një vend edhe nëpërmjet fazës tradicionale kualifikuese, duke u renditur në një nga dy vendet e para në grupin e saj, atëherë promovohet skuadra e renditur e dyta në Ligën e Kombeve. Në total, të gjitha skuadrat pjesëmarrëse do të përfitojnë 76 250 000 euro nga fondi i solidaritetit të UEFA-s për këtë sezon të parë. Paratë do të ndahen si më poshtë:
1 500 000 euro për skuadrat pjesëmarrëse në Ligën A
1 000 000 euro për skuadrat pjesëmarrëse në Ligën B
750 000 euro për skuadrat pjesëmarrëse në Ligën C
500 000 euro për skuadrat pjesëmarrëse në Ligën D
Çdo skuadër fituese e grupeve do të dyfishojë këtë shpërblim.
Fituesja e parë e Ligës së Kombeve do të arkëtojë edhe 4 500 000 euro të tjera, skuadra e vendit të dytë 3 500 000 euro, vendi i tretë 2 500 000 euro dhe vendi i katërt 1 500 000 euro.
