“Ajo që ndodhi pas duelit nuk ka lidhje aspak me sportin, ishte një gjë e shëmtuar. Nuk di se çfarë të them më shumë, pasi nuk e di se çfarë do të ndodhë më tej”, ka reaguar Dana White pas incidentit që ndodhi pas duelit mes Khabib Nurmagomedov dhe Conor McGreghor në eventin UFC-229, që u zhvillua mëngjesin e së dielës në Las Vegas.
Kreu i UFC-së shprehet se tashmë do të jetë Komisioni i Sportit në Nevada ai që do të marrë vendimin. “Do të ketë masa të ashpra, kjo është e sigurtë dhe ai djalosh, Khabib, është në telashe të mëdha pas asaj që ndodhi. Nuk e kuptoj reagimin e tij, pasi e fitoi duelin, bëri një sfidë të mirë dhe arriti të mposhtë rivalin kryesor, duke fituar respekt. Më pas…”.
Duke folur për masat e mundshme që Komisioni i Sportit në Nevada mund të marrë, presidenti i UFC-së tha: “Do të ketë një gjobë të majme, kjo është e sigurtë (për momentin i është pezulluar shpërblimi prej 2 milionë dollarësh). Mund të mos i japin më vizë për të dueluar në Amerikë… Nuk di tjetër, një Zot e di se çfarë dënimi mund të marrë Nurmagomedov”, tha Dana White, që personalisht refuzoi t’i vendoste gjerdanin e kampionit të botës në brez pas duelit.
