Bizesmeni Nikollaq Neranxi i ka rezistuar policisë duke hyrë brenda ambienteve të biznesit të tij duke mos lejuar atë ta arrestonte pas incidentit me patrullën.
Mirëpo, tashmë ai është shoqëruar nga efektivët në komisariatin numër 6. Më herët, pas situatës së krijuar me patrullën e policisë, Neranxi i ndihmuar nga rojet e tij, dhe është futur brenda ambienteve të kompanisë së tij “Neranxi” ku po mbahej një panair.
Ai ka marrë mikrofonin dhe i është drejtuar punonjësve të tij por edhe të prnaishmëve me një fjalim, ku ka hedhur dyshimin se personat që shfaqen në hyrje të kompanisë, nuk janë policë.
“Unë do shkoj në polici për tu sqaruar. Të nderuar pjesëmarrës njoftoni ambasadat, Shqipëria dhe shqiptarët po rrezikojnë. Nuk duhet të jenë polica, ata duhet të jenë polica, shikoni dokumentet. Nuk ka mundësi të jenë polica, policia e shtetit është e respektuar nga ne. Ata kanë ardhur pa mandat të arrestojnë kryetarin e Shoqatës për Mbrojtjen e Tregtarëve dhe tregut të Shqipërisë. Nxirrini përjashta, përjashta, përjashta”, shprehet Neranxi.
“Më datë 23.04.2016, rreth orës 16:10, shërbimet e Komisariatit të Policisë nr 6, të planizuar me shërbim në rrugën dytësore të autostradës Tiranë – Durrës, kanë konstatuar disa mjete të parkuara në mënyrë të parregullt. Shërbimi i Policisë ka filluar të vendosë masa administrative ndaj këtyre mjeteve, por është kundërshtuar, sharë dhe ofenduar gjatë kryerjes së detyrës, nga shtetasi N. N. Menjëherë shërbimet e Policisë kanë marrë masa për shoqërimin e këtij shtetasi por janë penguar nga dy rojet e tij të cilët janë shoqëruar në ambientet e Komisariatit të Policisë nr. 6 Po punohet për gjetjen dhe shoqërimin e N. N. dhe sqarimin e plotë të rrethanave”, njoftoi më parë policia.
Biznesmeni Nikollaq Neranxi akuzohet se ofendoi efektivët e policisë pasi kundërshtoi gjobat që efektivët po vinin në disa makina të parkuara gabim pranë kompanisë së tij në një rrugë dytësore në autostradën Tiranë-Durrës.
Biznesmeni është shfaqur mjaft shpesh në media kohët e fundit, ku ka kundërshtuar fortë taksat e lartë që Bashkia e Tiranës ka vendosur ndaj biznesit.
