Nga Boldnews.al
Top Channel arriti fitoren e parë të tij në “vetingun” e gjyqtarëve dhe prokurorëve, duke dhënë një dëshmi të radhës se Komisioni i Pavarur i Kualifikimit i merr vendimet e tij jashtë zyrave të këtij institucioni.
Paraditen e së Hënës, Komisioni i Vetingut vendosi të shkarkojë nga detyra anëtarin e Gjykatës së Lartë, Shkëlzen Selimi, i cili ishte kthyer në shënjestër sulmesh prej rreth dy muajsh në kronikat e televizionit Top Channel.
Shkëlzen Selimi është pjesë e një trupe të Gjykatës së Lartë, e cila po shqyrton padinë civile për pronësinë e televizionit të e administratores aktuale, Vjollca Hoxha, kundër dy bashkëpronarëve, të cilët kanë shumicën e aksioneve.
Në periudhën qershor-korrik 2018, Top Channel ka transmetuar një seri kronikash televizive, të karakterizuara nga sulme abuzive ndaj gjyqtarit Selimi. Në “fushatën” e tij, Top Channel është ndihmuar edhe nga vetë Komisioni i Pavarur i Kualifikimit, institucion që i ka vënë në dispozicion televizionit dokumenta konfidenciale, të cilat i ka siguruar në kuadër të hetimit administrativ.
Një prej këtyre dokumentave, ku hidhen dyshime, por të paprovuara se gjyqtari Selimi ka “kontakte të papërshtatshme” me persona të lidhur me krimin e organizuar, iu vu në dispozicion Top Channel-it nga Komisioni i Vetingut një ditë para se ai të përballej në seancë dëgjimore me trupën gjykuese.
Publikimi abuziv i këtij dokumenti nga ana e KPK-së detyroi gjyqtarin Shkëlzen Selimi që të braktiste seancën dëgjimore, duke hedhur dyshime se anëtarët e Komisionit të Vetingut kanë shkelur parimin e konfidencialitetit dhe, mund edhe t’i kenë shitur Top Channel-it informacione mbi personin e tij.
Procesi i Vetingut ndaj gjyqtarit Shkëlzen Selimi provoi se Komisioni i Pavarur i Kualifikimit po ndjek një “skenar” të paracaktuar, duke bashkëpunuar me subjekte të ndryshëm, përfshirë media, të cilët kanë probleme me gjyqtarë apo prokurorë të caktuar.
Në rastin konkret, televizioni Top Channel, i drejtuar aktualisht nga Vjollca Hoxha dhe drejtor i përgjithshëm, Ben Blushi, kishte vendosur të kontribuonte maksimalisht në shkarkimin nga detyra të gjyqtarit Selimi. Në një situatë normale, televizioni që ka liçensë për t’i shërbyer publikut, duhet të mbante një qëndrim asnjëanës lidhur me procesin e Vetingut për gjyqtarët që kanë në dorë dosjen gjyqësore të pronësisë së Top Channel.
Por, në një situatë anormale, ose, “të jashtëzakonshme”, siç e kanë me dëshirë ta konsiderojnë “dashnorët e Reformës”, fushata abuzive dhe denigruese e zhvilluar nga Top Channel ndaj Shkëlzen Selimit, është konsideruar normalitet.
Asnjë organizën që monitoron median dhe procesin e Reformës në Drejtësi nuk ka reaguar për këtë sjellje abuzuese dhe shantazhuese ndaj një gjyqtari të një televizioni që, megjithëse me kapital privat, ka në përdorim liçensë për shërbim publik.
Autoriteti i Mediave Audiovizive (AMA) nuk është ndjerë aspak lidhur me këtë situatë. Ndoshta, për faktin se drejtuesi aktual, Gentian Sala, ka qenë drejtor i Digitalb (në pronësi të Top Channel), para se të merrte pozicionin zyrtar.
Është e tepërt të pritet reagim edhe Komiteti Shqiptar i Helsinkit, i cili propagandon mbrojtjen dhe respektimin e të drejtave të njeriut, kur ende nuk ka ngritur ende shqetësimin për mungesën e Gjykatës Kushtetuese.
Shoqatat e gjyqtarëve dhe prokurorëve ndihen të atrofizuara dhe nuk kanë as forcën, por, mesa duket, as vullnetin për të reaguar.
