Policia e Fierit dokumentoi grabitjen e një karburanti dhe arrestoi organizatoren e kësaj vepre penale, e cila është një vajzë nga Mallakastra. Anna Malaj, 31- vjeçe, u identifikua dhe arrestua ditën e djeshme si autore e vjedhjes së ndodhur më datë 2 korrik 2018. Nën kërcënimin e armës, ajo bashkë me kushëririn e saj (djalin e tezes), 22-vjeçarin Emiljano Grembim, arritën të marrin në një pikë karburanti në Levan një shumë prej 30 mijë lekësh të rinj.
Ata janë autorë edhe të dy ngjarjeve të tjera në dy karburante të tjera, por vjedhja iu ka mbetur në tentativë, pasi punonjësit kanë reaguar dhe mbrojtur pronën.
VJEDHJET
“Komisariati i Policisë Mallakastër, në bashkëpunim me Specialistët e Seksionit për Hetimin e Krimeve kundër pronës dhe pasurisë në Drejtorinë Vendore të Policisë Fier, falë punës operative e hetimore të mirorganizuar, bënë të mundur zbardhjen e tri ngjarjeve të ndodhura këtë muaj në Qarkun e Fierit, ku dy persona, nën kërcënimin e armës, gjatë orëve të vona të natës, shkonin për të vjedhur pika të ndryshme karburantesh.
“U ndalua një prej autorëve të dyshuar, shtetasja Anna Malaj, 31 vjeçe, banuese në fshatin Visokë, Mallakastër. Gjithashtu, u referuan materialet në Prokurorinë pranë Gjykatës së Shkallës së Parë Fier dhe po punohet për kapjen e shtetasit E.G., 22 vjeç, banues në fshatin Belinë, Patos”, thuhej në njoftimin e Policisë së Fierit.
Sipas këtij njoftimi, të dy këta shtetas (kushërinj me njëri-tjetrin), nën kërcënimin e armës, në datën 02.07.2018, në Levan, kanë vjedhur një pikë karburanti ku kanë marrë shumën prej 30 mijë lekësh të rinj.
Pesë ditë më pas, konkretisht më 7 korrik, në Mallakastër, nën kërcënimin e armës kanë tentuar të vjedhin një pikë karburanti, por pasi janë ndeshur me punonjësin e saj janë larguar. Edhe më 15 korrik 2018, në lagjen “1 Maji” në Fier, në bashkëpunim, duke kërcënuar me armë gjahu teke, kanë tentuar të vjedhin një tjetër pikë karburanti.
ORGANIZATORJA
Sipas burimeve nga Policia, vajza ishte ajo që drejtonte grupin. 31-vjeçarja ideonte grabitjet dhe bashkëpunonte me kushëririn e saj 22-vjeçar, i cili është shpallur në kërkim. Mësohet se vajza piketonte vendet ku do ndërhyhej dhe më pas me mjetin e saj shkonte te vendet dhe tentonin të vidhnin nën kërcënimin e armës.
Hetimet nisën që pas ngjarjes së parë të regjistruar në Levan, ku ata arritën të merrnin një shumë parash. Punonjësi i saj i ka deponuar grupit të hetimit se autorët kishin qenë dy veta me maska dhe se një prej tyre dukej si femër.
Edhe në dy tentativat e tjera, punonjësit e karburantit kanë sinjalizuar Policinë, nga ku kanë thënë se një prej autorëve ishte femër. Kjo ka vënë në lëvizje grupin e hetimit, me dyshimin se kishin të bënin me të njëjtin grup kriminal. Pasi panë edhe pamjet filmike në njërin prej karburanteve që u tentua të vidhej më 15 korrik, efektivët identifikuan 31-vjeçaren Anna Malaj.
Sipas burimeve, identifikimi i saj është kryer edhe nëpërmjet kamerave të sigurisë së subjekteve të tjera afër vendit të ngjarjes, ku është konstatuar makina e saj. Ndonëse në të tri rastet ajo është kujdesur që të vepronte me targë të falsifikuar, sërish blutë kanë mundur të bien në gjurmët e saj dhe të ndërhynin ditën e djeshme.
