Studentët që janë të interesuar të ndjekin një prej programeve të studimit në Shtetet e Bashkuara të Amerikës, tashmë mund të njihen me procedurat kryesore të aplikimit për t’u shpallur fitues. Ditën e djeshme, ambasada amerikane në Tiranë ka bërë një njoftim të rëndësishëm për të gjithë të interesuarit e më tej ka sqaruar kandidatët mbi 5 hapat që duhet të ndjekin.
“Para se të aplikojnë për një vizë, të gjithë aplikantët për vizë studentore duhet të pranohen dhe aprovohen për programin e tyre. Pas pranimit tuaj, institucionet arsimore dhe sponsorët e programit do t’ju japin dokumentacionin e nevojshëm të aprovimit, të cilin ju duhet ta paraqisni kur të aplikoni për një vizë”, theksojnë ekspertët e ambasadës.
Kriteret dhe aplikimi
Të interesuarit që dëshirojnë të studiojnë në Shtetet e Bashkuara duhet të dinë se nuk ka kriter moshe për t’u pranuar. Për sa i përket kritereve, është në varësi të universitetit. Megjithatë studentët duhet të bëjnë kujdes me formularin e aplikimit, tarifën e aplikimit (nëse ka), provimet e TOEFL dhe SAT, letra rekomandimi, eseja, aktivitetet jashtëshkollore, vërtetim bankar. Provimi i TOEFL është provimi që mat nivelin e gjuhës angleze, ndërsa SAT janë provim mbi matematikën dhe gjuhën angleze.
Ndryshe nga Shqipëria, ku çdo procedurë regjistrimesh në universitete është e rregulluar nga Ministria e Arsimit dhe është njësoj për të gjithë universitetet, në Amerikë, universitetet janë më të pavarura për sa i përket kritereve të pranimit që vendosin dhe data e aplikimit. Kjo do të thotë që secili universitetet në Amerikë ka kriteret e veta të pranimit dhe afatet e veta të aplikimit.
Të gjithë që përmbushin këto kritere të aplikimit mund të aplikojnë në universitete. Instruktorët e Qendrës Informative të Arsimit Amerikan në Shqipëri i orientojnë dhe qartësojnë aplikantët, që të ndjekin në mënyrë vijuese hapat e duhur.
Hapat kryesorë
Education USA e ka thjeshtësuar gjithë procesin duke e përmbledhur në pesë hapa. Hapi i parë është gjetja e universitetit. Në Amerikë ka mbi 4,500 institucione të arsimit të lartë, që ndahen në kolegje 2 vjeçare, universitete dhe kolegje 4 vjeçare. Hapi i dytë është financimi i studimeve. Studentët shqiptarë mund të aplikojnë për bursa të plotë dhe bursa të pjesshme. Hapi i tretë është procesi i aplikimit.
“Në momentin që dokumentet i keni gati mund të bëni aplikimin me postë ose elektronik në varësi të kërkesës së universitetit. Hapi i katërt është aplikimi për vizë. Në momentin, që vjen dokumenti i pranimit nga universiteti mund të aplikoni për vizën studentore F1. Hapin e pestë është takimi para nisjes në Amerike”,-bëjnë me dije ekspertët.
Të interesuarit mund të aplikojnë për të gjitha degët, madje edhe ato programe që në Shqipëri ende nuk ka. Drejtësia dhe mjekësia janë dy nga degët që kanë një rrugëtim ndryshe nga Shqipëria. Ndërkohë, shumë universitete lejojnë edhe studimin e dy degëve njëkohësisht, në mënyrë që studenti të jetë më i kompletuar për tregun e punës. Zakonisht tarifa totale e studimit përbëhet nga taksa e shkollës dhe nga shpenzimet e jetesës.
Një pjesë e financimit mund të jetë edhe ndërmjet bursave. Bursat ndahen në bursa merite dhe bursa nevoje. Bursa e meritës i akordohet studentëve të shkëlqyer si në rezultatet e gjimnazit edhe në provimet e TOEFL dhe SAT. Gjithashtu, çdo dokument i dosjes së aplikimit do të vlerësohet për të arritur në vendimin nëse e meriton bursën e meritës. Ka, gjithashtu, universitete që ofrojnë bursa nevoje për studentët ndërkombëtarë.
5 hapat e aplikimit për studime në SHBA:
1. Shqyrto alternativën më të mirë për arsimim
Hapi i parë është gjetja e universitetit. Në Amerikë ka mbi 4,500 institucione të arsimit të lartë, që ndahen në kolegje 2 vjeçare, universitete dhe kolegje 4 vjeçare.
2. Përfundo dokumentacionin për aplikim
Hapi i dytë është financimi i studimeve. Studentët shqiptarë mund të aplikojnë për bursa të plota dhe bursa të pjesshme.
3. Financo studimet, duke aplikuar për bursë
Hapi i tretë është procesi i aplikimit. Në momentin që dokumentet i keni gati mund të bëni aplikimin me postë ose elektronik në varësi të kërkesës së universitetit.
4. Apliko për vizë studenti
Hapi i katërt është aplikimi për vizë. Në momentin, që vjen dokumenti i pranimit nga universiteti mund të aplikoni për vizën studentore F1.
5. Përgatit udhëtimin për në USA
Hapi i pestë është takimi para nisjes në Amerikë
