Nga Boldnews.al
Publiku i emisionit Top Show në Top Channel, i përbërë nga disa njerëz hallexhinj që duartrokasin në këmbim të 500 lekëve të reja, është detyruar që të luajë rolin e “shoqërisë civile” në protestën groteske të zhvilluar të mërkurën nga televizioni kundër anëtarit të Gjykatës së Lartë, Shkëlzen Selimi.
“Boldnews.al” ka raportuar se televizioni, i cili pretendon se ka primatin e audiencës në Shqipëri, raporti gjatë së Mërkurës lidhur me një protestë “qytetare”, të organizuar pranë selisë së Komisionit të Pavarur të Kualifikimit, ku kërkohej përshpejtimi i procesit të Vetingut. Folësja kryesore e kësaj “proteste qytetare”, për të cilën TCH nuk i prezantoi as emrin dhe as se çfarë përfaqësonte, kërkoi shkarkimin dhe arrestimin e gjyqtarit Selimi.
Shkëlzen Selimi është një prej anëtarëve të trupës gjykuese në Gjykatën e Lartë, e cila po shqyrton padinë lidhur me pronësinë e televizionit Top Channel. Prej disa muajsh, Vjollca Hoxha dhe fëmijët e saj janë në një proces gjyqësor përballë aksionerëve të shumicës së aksioneve, Aurel Baçi dhe Albert Sino.
E veja e themeluesit Dritan Hoxha, në bashkëpunim me drejtorin e përgjithshëm të televizionit, Ben Blushi, kanë ndërmarrë një fushatë sulmi dhe denigrimi ndaj gjyqtarit Selimi. Me shumë mundësi, ky gjyqtar nuk ka pranuar “diktatin” e Vjollca Hoxhës për të mbajtur anën e saj në procesin gjyqësor.
Pas një serie kronikash abuzive ndaj gjyqtarit Selimi, dyshja Vjollca-Blushi organizuan edhe një protestë “qytetare” kundër gjyqtarit Shkëlzen Selimi. Por, si një protestë e organizuar keqazi, me shpejtësi dhe vetëm me qëllimin për të shantazhuar dhe goditur gjyqtarin Selimi, organizatorët dështuan në mënyrë spektakolare.
Në pamjet e transmetuara nga vetë Top Channel në edicionin e lajmeve të mesditës, kamerat kishin fokusuar në grupin e protestuesve prej 15-20 personash edhe Ervin Zenelin, nipin e Vjollca Hoxhës, pronares aktuale të televizionit.
Kjo “gafë”, e publikuar nga “Boldnews.al”, detyroi drejtuesit e televizionit, pronaren Vjollca Hoxha dhe drejtorin e përgjithshëm, Ben Blushi, që të rishihnin kronikën. Në edicionin e mbrëmjes, fytyra e nipit të Vjollcës nuk gjendej më në lajme, në tentativë për të fshehur “protestuesit” e vërtetë.
Gjithësesi, kjo përpjekje rezultoi e dështuar, për faktin se “Boldnews.al” zbuloi edhe të tjerë “protestues të shoqërisë civile”, të cilët janë rrogëtarë në Top Channel. Në fotot që shoqërojnë këtë shkrim paraqiten disa hallexhinj, të cilët janë pjesë e publikut-dekor në emisionin “Top Show magazine” në Top Channel. Këta persona, me shumë mundësi të joshur nga një pagesë dyfishe ditore, kanë marrë nga një pankartë në dorë dhe kanë protestuar kundër gjyqtarit Selimi.
Gjithashtu, në pamjet e transmetuara nga vetë TCH, dallohet si “pjesëmarrës aktiv” edhe shoferi personal i Vjollca Hoxhës. Këto pamje, me shumë mundësi drejtori Blushi nuk ka pasur mundësi t’i fshijë, për faktin se, nëse do të hiqeshin edhe fytyrat e tyre, atëherë në protestë nuk do të mbetej asnjë pjesëmarrës.
