Kryetari i Partisë Demokratike, Sali Berisha, ka akuzuar kryeministrin Edi Rama se ka penguar arritjen e një marrëveshjeje për Reformën Territoriale dhe se po ndjek të njëjtën qasje edhe për Reformën Zgjedhore.
Në një deklaratë jashtë Kuvendit, Berisha tha se PD ka paraqitur një projekt të saj për organizimin territorial të vendit, i cili parashikon rritjen e numrit të bashkive nga 90 në 110, si dhe rikthimin e komunave mbi bazën e kritereve demografike.
“Ne kemi projektin tonë i cili ka një numër bashkish nga 90 në 110, por shtohen komunat. Ne nuk themi që të shkojmë te modeli i mëparshëm, sepse ka ndryshime demografike, por ne kërkojmë rikthimin e komunave, mbi bazën e kritereve demografie.
Ose aty ku kanë qenë 2-3 komuna mund të krijohet një komunë. Ne kemi bërë një punë serioze, por kjo s’u lejua, sepse Rama s’e do reformën.
Edi Rama s’pranon asgjë përveç asaj që mendon vetë. Ju garantoj që Edi Rama ka të njëjtin skenar për Reformën Zgjedhore”, tha Sali Berisha.
