Një sasi lënde plasëse, e dyshuar si tritol, ka shpërthyer në portën e banesës së Altin Ballës, vëllait të Julian Ballës, në zonën e Shijakut.
Ngjarja ka ndodhur të shtunën, më 17 korrik. Si pasojë e shpërthimit nuk ka pasur persona të lënduar, por vetëm dëme të vogla materiale. Deri më tani policia nuk ka identifikuar autorin.
Lënda shpërthyese ishte vendosur në derën e banesës së Altin Ballës, e cila ndodhet ngjitur me shtëpinë e vëllait tjetër, Fadil Ballës.
Sipas hetuesve, mënyra e vendosjes së eksplozivit lë të kuptohet se bëhet fjalë më tepër për një mesazh kërcënues.
Julian Balla ndodhet në kërkim prej rreth një viti nga SPAK, pasi ndaj tij është caktuar masa e sigurisë “arrest me burg”, në kuadër të operacionit që goditi organizatën kriminale të njohur si grupi i Çopjave dhe Çelajve në Elbasan.
Julian Balla është pronar i resortit “Ajman Park” në Xhafzotaj të Durrësit, që përfshin hotele, godina shërbimi, restorant dhe ambiente tregtare, si edhe i vilës dykatëshe “ELYSIAN” në bregdetin e Dhërmiut, në bashkinë Himarë, me sipërfaqe totale rreth 378.2 metra katrorë dhe vlerë tregu të përllogaritur rreth 1 milion euro.
Të dyja këto pasuri janë sekuestruar nga SPAK. Balla ka qenë gjithashtu edhe ish-president i klubit të futbollit “Erzeni”.
Sipas dosjes së operacionit të SPAK të zhvilluar në gusht të vitit të kaluar, grupi kriminal i Çopjave ka trafikuar rreth 28 ton kokainë nga Amerika Latine drejt Evropës, në dy episode të ndryshme, ndërsa 17 ton prej tyre janë sekuestruar.
Nga hetimet rezulton se Franc Çopja bashkëpunonte me Ervis Çelën, i cili së bashku me vëllain e tij siguronte lëndën narkotike nga prodhuesit. Kokaina magazinohej dhe përgatitej për transport në Paraguai, ku fshihej në produkte të ndryshme.
Më pas, kontejnerët transportoheshin me rrugë detare nga Amerika e Jugut drejt Belgjikës dhe Gjermanisë, për t’u shpërndarë më tej në tregun evropian.
