Drejtori i Përgjithshëm i Policisë së Shtetit, Skënder Hita, priti në një takim përfaqësuesen e Programit ICITAP për Evropën dhe Azinë, Alexzandria Burns, si dhe drejtuesin e Programit ICITAP në Shqipëri, Richard Deasy.
Gjatë takimit u vlerësua partneriteti mbi 30-vjeçar ndërmjet Policisë së Shtetit dhe Programit ICITAP.
Hita shprehu mirënjohjen për mbështetjen e vazhdueshme që ICITAP i ka ofruar Policisë së Shtetit, përmes asistencës teknike, këshillimit strategjik, programeve të trajnimit dhe projekteve të zhvillimit institucional, duke e cilësuar këtë partneritet si një nga shtyllat më të rëndësishme të zhvillimit të institucionit.
Hita, theksoi se thellimi i bashkëpunimit me ICITAP-in, Departamentin e Drejtësisë së Shteteve të Bashkuara dhe agjencitë partnere ligjzbatuese mbetet një prioritet strategjik i Policisë së Shtetit, me synim forcimin e mëtejshëm të kapaciteteve profesionale, shkëmbimin e përvojave më të mira ndërkombëtare, përdorimin e teknologjive moderne dhe rritjen e efektivitetit në parandalimin dhe goditjen e krimit.
Palët riafirmuan më tej, angazhimin për zgjerimin e mëtejshëm të bashkëpunimit në fusha me interes të përbashkët.
