Ish-deputeti i PD-së, Lefter Maliqi ka reaguar pas vendimit të SPAK për të marrë të pandehur ish-kryebashkiakun e Divjakës, Fredi Kokoneshi, përmes të cilit ka shënjestruar kryebashkiakun e Kuçovës Kreshnik Hajdari.
Maliqi shprehet se edhe Hajdari, sikurse kolegu i tij në Divjakë, do të përballet me drejtësinë kur “të bjerë nga karrigia”, sepse sipas tij, “po re nga fiku të gjithë të shesin”.
“Po ti, Hajdar, që miratove leje për ndërtim ujësjellësi mbi 4 milionë euro në tokë të Gramshit dhe jo të Kuçoves, pa leje mjedisi, në zonë të mbrojtur? Po për 10 kallëzime të tjera të rënda? Disa po i mbyll, sepse ke oligarkë, firma ndërtimi e politikanë që të mbrojnë, se kanë interesa të të keqpërdorin dhe të të shfrytëzojnë.”, shkruan Maliqi.
Maliqi thekson se do të vazhdojë betejën e tij ligjore, pavarësisht pengesave, për ta vënë atë para drejtësisë dhe për të dhënë llogari për abuzimet me taksat e qytetarëve në një bashki që sipas tij iu dhurua Hajdarit në vitin 2019 pa garë dhe më pas e grabiti në vitin 2023.
Reagimi i plotë:
Po re nga fiku të gjithë të shesin, Hajdar. Kolegu juaj, ish-kryetari i Bashkisë Divjakë, Kokoneshi, pasi ra nga detyra, sot u mor i pandehur nga SPAK, drejt burgut, për leje në tokë bujqësore për impiante diellore!Siç janë denuar ish kryetaret e Durresit,te Kavajes,Fushe Arrezit,Himares etj pasi kanë rënë nga detyra!
Po ti, Hajdar, që miratove leje për ndërtim ujësjellësi mbi 4 milionë euro në tokë të Gramshit dhe jo të Kuçoves, pa leje mjedisi, në zonë të mbrojtur? Po për 10 kallëzime të tjera të rënda? Disa po i mbyll, sepse ke oligarkë, firma ndërtimi e politikanë që të mbrojnë, se kanë interesa të të keqpërdorin dhe të të shfrytëzojnë.
Po kur të biesh nga karrigia, e ke menduar se ç’të pret? A e di që do të të shesin të gjithë? Edhe Kokoneshi, kur ishte kryetar bashkie, ishte i fortë, por sa iku, u mor i pandehur!
Sigurisht, unë do ta vazhdoj betejën ligjore, duke e ditur që të mbrojnë në SPAK, Gjykatë, KQZ etj., por kjo betejë, me sa po bindem, jo vetëm unë, por çdo avokat, prokuror, gjyqtar e politikan që njoh, më thonë: “Tani e ke të vështirë, se e mbrojnë për shkak të interesave, por kur të bjerë, do të shkojë te vendi të japë llogari për çdo abuzim me taksat e qytetarëve në atë bashki të dhuruar në 2019 pa garë dhe të grabitur në 2023!”
“Gjëja e dhuruar dhe e vjedhur nuk gëzohet, të del nga hundët”, thotë populli!
Drejtësi e vonuar, por do të vihet në vend! Vazhdo, Hajdar, gëzohu edhe ca muaj, se ka Zot. Të gjitha do të lahen! Dhe secili merr atë që meriton!
