Kreu i Partisë Demokratike, Sali Berisha ka reaguar në lidhje me hetimin që ka nisur Policia e Shtetit ndaj një “fushate” online kundër bizneseve të afërta me qeverinë, duke vënë nën verifikim mbi 10 mijë profile false.
Në një deklaratë, Berisha theksoi se hetimi është urdhëruar nga Kryeministri Edi Rama, për të cilin thotë se është i tmerruar nga protesta masive që vijon prej më shumë se një muaji në shesh.
“I tmerruar nga uragani i protestës rinore e qytetare, i damkosur brenda dhe jashtë vendit, Edi Rama urdhëroi së fundmi narkopolicinë e tij dhe shërbimin informativ të policojnë veprimtarinë digjitale dhe rrjetet sociale të protestuesve, në fakt të mbarë qytetarëve.”, deklaroi Berisha.
Berisha thotë se PD e konsideron si të pacenueshme të drejtën e çdo qytetari për të shprehur mendimin dhe opinionin e tij në rrjetet sociale për çdo gjë dhe për cilindo.
Sipas tij, kjo fushatë gjasme kundër përshtypjeve negative është organizuar nga “narkoinstitucionet” dhe “patronazhistët” për të sulmuar pjesëmarrësit e protestës.
“Nën pretekstin e identifikimit të autorëve të këtyre përshtypjeve negative, kërkohet të gjendet një shkak për të vendosur një policim të plotë, digjital dhe masiv të veprimtarisë online të qytetarëve”, shtoi ai, duke e konsideruar këtë veprim si të ngjashëm me regjimin e Iranit.
“Me policimin digjital, po përgatitet terreni që ashtu siç bëri me TikTok-un dhe duke ndjekur shembullin e Ajatollahëve të bllokohen mijëra llogari dhe, po qe e mundur, rrjetet sociale në tërësi.”, shtoi ai.
