Ikona e muzikës rock, Bonnie Tyler, është ndarë nga jeta në moshën 75-vjeçare.
Lajmi u konfirmua përmes një deklarate të publikuar nga familja dhe ekipi i saj, ku bëhet e ditur se artistja ndërroi jetë në një spital në Portugali, si pasojë e sëmundjes për të cilën po trajtohej.
“Familja dhe ekipi i Bonnie janë zemërthyer që njoftojnë se ajo u nda papritur nga jeta mbrëmjen e kaluar në spitalin në Portugali, si pasojë e komplikacioneve të sëmundjes.
Në ditët në vijim do të publikojmë një deklaratë të mëtejshme, ndërsa kërkojmë respektimin e privatësisë në këtë moment të vështirë”, thuhet në njoftim.
Në muajin maj, Bonnie Tyler ishte shtruar me urgjencë në një spital në Faro, ku iu nënshtrua një ndërhyrjeje kirurgjikale. Pas operacionit, mjekët e vendosën në koma të induktuar për të ndihmuar rikuperimin e saj.
Më vonë, përfaqësuesit e këngëtares njoftuan se ajo kishte dalë nga koma, por vijonte të ishte në gjendje të rëndë në repartin e terapisë intensive. Për shkak të problemeve shëndetësore, një pjesë e turneut të saj veror u anulua ose u shty.
Bonnie Tyler do të mbahet mend si një nga zërat më karakteristikë të muzikës rock. Ajo arriti famë botërore me hitin “Total Eclipse of the Heart”, këngë që u shndërrua në një nga sukseset më të mëdha të viteve ’80 dhe kryesoi klasifikimet muzikore në shumë vende të botës.
Në repertorin e saj bëjnë pjesë edhe këngë të njohura si “Holding Out for a Hero” dhe “It’s a Heartache”, të cilat e konsoliduan statusin e saj si një prej artisteve më të rëndësishme të brezit të saj.
Vdekja e Bonnie Tyler shënon fundin e një karriere të gjatë dhe të suksesshme, ndërsa muzika e saj do të mbetet një trashëgimi e çmuar për breza të tërë adhuruesish.
