Ish-ministri i Mbrojtjes, Gazmend Oketa, vijon dëshminë e tij në Gjykatën e Posaçme, ku u pyet nga SPAK lidhur me procedurat për dorëzimin e pronës në administrim të Komandës Mbështetëse.
I pyetur nëse ishte njohur me dokumentacionin përkatës para firmosjes së urdhrit, Oketa u shpreh se praktika kishte kaluar në disa hallka dhe kishte mbërritur e plotë në ministri për miratim final.
Ai theksoi se, sipas tij, pas vitit 1990 shumë prona të Ministrisë së Mbrojtjes kishin dalë jashtë përdorimit ushtarak dhe trajtoheshin sipas procedurave të rregullta ligjore.
Sa i përket komunikimeve me ish-zyrtarë ushtarakë, përfshirë gjeneralin Vladimir Qirjazi, Oketa konfirmoi se kanë pasur takime të herëpashershme në kuadër të detyrës, duke shtuar se vendimmarrja ishte institucionale dhe jo personale.
Diskutimet:
SPAK: Urdhrin që keni firmosur që ta dorëzonte komanda mbështetëse, jeni njohur me ndonjë dokument?
Oketa: Çdo person që ka pasur për detyrë për të ndjekur këtë praktikë ka firmosur dhe në fund ka ardhur tek unë. Pas vitit 1990 shumë prona të Ministrisë së Mbrojtjes dolën të tepërta dhe shumë prona dalin nga plani i përhapjes sepse nuk i duhen ushtrisë. Edhe në këtë rast është ndjekur e njëjta praktikë. Nuk është e vetmja pronë që është kthyer, sepse kur prona del nga plani i përhapjes, shteti e përdor për interesa të tij nëse nuk ka pronarë.
Oketa: Historia e Ministrisë së Mbrojtjes nuk fillon kur u bëra ministër. Prona në fjalë ka qenë jashtë planit të përhapjes, në dijeninë time. Nuk arrij ta kuptoj sensin e pretendimeve. Gjeneral Qirjazi dha urdhër për ngritjen e grupit të punës, çështja e regjistrimit nuk është punë e ministrit.
SPAK: Pse nga komanda mbështetëse dhe jo një përfaqësues i Ministrisë?
Oketa: Unë jua thashë: kthejuni pronarëve, jo nuk jua thashë unë, jua tha ligji. Po jua theksoj, është edhe sot e njëjta praktikë. Është përdorur i njëjti standard për trajtimin me të njëjtin seriozitet dhe përkushtim.
SPAK: E keni takuar Vladimir Qirjazin për këtë çështje?
Oketa: Do ta vazhdoj dhe sot e kësaj dite pse komanda mbështetëse. Unë nuk bëj pjesë tek ata njerëz që i dinë të gjitha, prandaj ministri ka edhe këshilltarë. Nëse gjeneralët shqiptarë janë për të mbajtur yje mbi shpatulla dhe asnjë përgjegjësi, atëherë është problemi i tyre. Ka pasur takime të herëpashershme me Gjeneral Qirjazin; kemi qenë prezent herë me njerëz të tjerë dhe herë vetëm, por nuk e kuptoj sensin e pyetjeve.
Oketa: Unë e kam urdhëruar me shkrim firmosjen. Nuk ka rëndësi nëse duhet të firmoste Qirjazi apo jo. Unë nuk mbaj mend t’i kem thënë që firmos, se kështu më është kërkuar edhe mua. Unë kujtoj që i vetmi debat ishte se prona nuk ishte regjistruar. Për aq kohë sa shkëmbimet e shkresave kanë vijuar dhe gjenerali ngriti grupin e punës, urdhri ka qenë i saktë; intensitetin e zërit dhe nivelin e zërit nuk e kujtoj. Nuk di sa kam qenë unë ministër, gjeneralit t’i ketë hyrë gjemb në këmbë.
SPAK: Besnik Dervishin ku e keni njohur dhe si?
Oketa: Zoti Dervishi është inxhinier ndërtimi, i kam njohur në marrëdhënie pune. Pasi kalova ministër, unë i kam kërkuar që të bëhej drejtor kabineti. Kur ishte drejtor nuk di të ketë pasur aktivitet privat, para dhe pas po. Secili nga bashkëpunëtorët e mi ka mbajtur vendin që i takon, nuk është miksuar raporti personal me atë të punës. Top Channel
