Një nga aktivistët e protestës popullore që vijon prej 22 ditësh në bulevardin para Kryeministrisë, ku kërkohet dorëheqja e qeverisë dhe largimi i kastës së vjetër politike, tha sot për “News24” se kjo protestë është gjëja më e bukur që i ka ndodhur Shqipërisë dhe ku diaspora është bashkuar në një biletë pa kthim.
Mësuesi shpjegoi se ka edhe kërcënime dhe presione, por ato nuk i trembin dot, pasi qytetarët e treguan me shembull se si rrethohet kryeministria, edhe pa përdorur “Molotov”.
Kurse për deputeten Marjana Koçeku u shpreh se ajo duhet ta tregojë me vepra pendesën e saj dhe të marrë me vete 11 deputetë socialistë për të mosbesuar me mocion në parlament Ramën, duke i kujtuar edhe protestat e studentëve vite më parë kundër kryeministrit.
“Nuk më trembin as intimidimet dhe as kërcënimet. Ata po e ndjejnë fundin, ndaj pushteti kërcënon, po e ndjejnë. Opozita duhet të reflektojë dhe pastaj të bashkohet, të thonë “po gabuam” siç po ndodh edhe me reflektimin e deputetes Marjana Koçeku. Më njoftuan se Marjana ka qenë në protestë, por prezenca e saj nuk ka vlerë nëse nuk reflekton.
Unë e kam denoncuar një herë, se ka qenë krahu im i djathtë i protestës së studenteve në krah të saj. U mashtrova njëherë. Gjithmonë ka vend për reflektim. Është e zonja, le të marrë edhe 11 deputetë të tjerë të PS me vete, të bëjë kërkesë për votëbesim të Ramës në parlament, le të bëjë grupim më vete dhe unë do jem i pari që i bashkohem. Kam frikë se mos po bën lojën, nuk mund të pastrohesh për 8 ditë”, u shpreh ai.
Ai tha se nuk duhet bërë kurban populli, por ata që i japin qytetarëve të “hanë me lugë të ndryshkur me kancer”.
“Pse të bëhemi ne kurban, le të bëhen ata kurban. Lugën e ndryshkur ta hanë ata dhe jo populli. Ne nuk e hamë më lugën e ndryshkur, populli nuk e ha më kancerin, se luga e ndryshkur është kancer. Nuk ka njeri që ia shuan bukurinë kësaj proteste. Protesta ka kulturë edhe në piknik ngelen mbeturina, kurse këtu ka kujdes e kulturë. Kryeministria nuk është rrethuar kurrë me njerëz qytetarë të kulturuar ku ka një mesazh dorëheqjen e kryeministrit. Ishte një mesazh paqësor për ikjen e kryeministrit me rrethimin e kryeministrisë. Kryeministria është sulmuar me armë molotov dhe s’e kanë rrethuar dot, kjo është hera e parë që rrethohet me qytetarë e japin mesazh kryeministrit”, vijoi ai.
Sipas aktivistit, diaspora tani ka marrë një biletë pa kthim, për betejë deri në fund.
“Diaspora ka prerë një biletë pa kthim që vendi të ndryshojë. Rrethimi i kryeministrisë ishte një akt i bukur, ishte për të treguar se s’bëjnë 21 janarin, po japin shembull të jashtëzakonshëm qytetarie. Aty rinis t’i shikosh që u shkëlqejnë sytë dhe thonë se ne jemi të vendosur se kemi mbështetje ndërkombëtare. Jemi shumë të lumtur se kemi mbështetje dhe diasporën, njerëz që vuajnë, e do bëjnë çdo përpjekje. Janë në unison dhe i bashkon një kauzë”, u shpreh ai.
