Lumi i protestuesve ka pushtuar bulevardin “Dëshmorët e Kombit” në kryeqytet. Qindra mijëra shqiptarë, mes tyre edhe shumë emigrantë të ardhur nga diaspora, kanë mbushur bulevardin cep më cep, në atë që organizatorët e konsiderojnë si protestën më të madhe antiqeveritare të zhvilluar ndonjëherë në vend.
Një nga momentet më kulmore të kësaj proteste u shënua pranë Piramidës së Tiranës, ku një grup të rinjsh shpalosën dhe valëvitën flamurin kombëtar.
Mes duartrokitjeve dhe brohoritjeve të protestuesve, flamuri kuqezi u hap në shkallët e Piramidës, duke krijuar një nga imazhet më simbolike të manifestimit të sotëm në kryeqytet.
Pamjet janë shpërndarë gjerësisht në rrjetet sociale, ndërsa marshimi i protestuesve vijon drejt godinës së Kryeministrisë.
