“Mehrdad Mohammadinia dhe Askan Maleki, autorët kryesorë të zjarrvënies dhe shkatërrimit të një xhamie (në qendër të Teheranit), u varën këtë mëngjes”, raportoi faqja e internetit e gjyqësorit Mizan Online.
Përpara shpërthimit të luftës në Lindjen e Mesme, në Iran shpërthyen demonstrata në fund të dhjetorit në shenjë proteste kundër rritjes së kostos së jetesës, përpara se këto të shndërroheshin në një valë masive demonstratash që arritën kulmin më 8 dhe 9 janar dhe në shumë raste çuan në trazira.
Teherani ua atribuoi këto “terroristëve të armatosur”, të cilët beson se mbështeteshin nga Izraeli dhe SHBA-të, armiqtë kryesorë të Iranit.
“Përballë kërcënimit të sulmit ushtarak nga SHBA-të dhe regjimi sionist, veprimet e këtyre individëve (…) shërbyen si pretekst për agresionin ushtarak” të shkurtit, sipas Mizan.
Që atëherë, arrestimet dhe ekzekutimet janë rritur në Republikën Islamike, të kombinuara me luftën dhe protestat në fillim të vitit.
