Një hetim i gjerë i BBC ka zbuluar identitetin e një prej kontrabandistëve më të fuqishëm të emigrantëve në Europë, i njohur deri më tani me pseudonimin “Kardo Ranya”, i cili dyshohet se drejtonte një rrjet të madh trafikimi njerëzish nga Lindja e Mesme drejt Mbretëria e Bashkuar.
Sipas investigimit të publikuar nga BBC, emri i vërtetë i trafikantit është Kardo Muhammad Amen Jaf, një 28-vjeçar kurd nga Ranya, i cili për vite me radhë kishte shmangur arrestimin duke përdorur identitete të rreme dhe rrjete të fshehta komunikimi.
Hetimi, i realizuar nga gazetari Niall McCracken dhe kolegu i tij Rob Lawrie, ndoqi gjurmët e rrjetit kriminal nga kampet e emigrantëve në veri të Francës deri në Kurdistanin irakian. Gazetarët arritën të siguronin dokumente me identitetin e vërtetë të Jafit dhe më pas e kontaktuan drejtpërdrejt.
Sipas autoriteteve britanike, rrjeti i tij besohet se ka organizuar një pjesë të madhe të kalimeve ilegale me gomone nëpër Kanali Anglez gjatë viteve të fundit.
“Shumica e modelit kriminal të kalimeve me varka të vogla kontrollohet nga kurdët”, deklaroi Dan Cannatella-Barcroft nga NCA, duke shtuar se një numër kontrabandistësh nga rajoni i Ranyas janë vënë në shënjestër të hetimeve.
17 mijë euro për një udhëtim ilegal
Një ish-anëtar i rrjetit kriminal tha për BBC se organizata e Kardo Ranyas kërkonte rreth 17 mijë euro për të transportuar një emigrant nga Iraku drejt Britanisë, ndërsa për “paketa VIP” shumat arrinin deri në 160 mijë paund për familje.
Në rrjetet sociale, trafikanti reklamonte udhëtimet drejt Britanisë me video luksi nga Londra dhe dëshmi të emigrantëve që kishin mbërritur me sukses.
Megjithatë, udhëtimet rezultonin shpesh tragjike. BBC dokumenton edhe rastin e një 24-vjeçari nga Ranya, i quajtur Shwana, i cili humbi jetën gjatë një tentative kalimi në Kanalin Anglez, pasi gomonia me mbi 100 persona nisi të fundosej në mes të detit.
Familja e tij deklaroi se ishte ndikuar nga propaganda e trafikantëve në rrjetet sociale, ku premtohej një jetë më e mirë në Britani.
Përballja me trafikantin
Gazetarët e BBC-së arritën të kontaktonin vetë Jafin përmes WhatsApp-it, duke u shtirur si klientë që kërkonin të dërgonin familjen drejt Britanisë.
Sipas investigimit, trafikanti u ofroi atyre një “shërbim VIP”, që përfshinte udhëtim ajror dhe transport të sigurt në Mbretërinë e Bashkuar.
Kur u përball me akuzat për trafik njerëzish, Jafi i mohoi ato, duke pretenduar se ai vetëm “u jepte këshilla njerëzve se si të largoheshin nga Iraku”.
Ai mohoi gjithashtu përfshirjen në tragjedinë ku humbi jetën Shwana, përpara se të ndërpriste telefonatën me gazetarët.
BBC raporton se numri i përdorur nga Jafi është çaktivizuar që prej publikimit të hetimit, ndërsa të paktën një polici europiane e kërkon tashmë për ta marrë në pyetje. Vendndodhja e tij mbetet ende e panjohur.
