Nga Boldnews.al
Me ardhjen në krye të Policisë së Shtetit të Skënder Hitës, është konstatuar një ri-dimensionim i fuqishëm i oficer Erion Ahmetit, i shkarkuar vetëm pak muaj më parë pas një skandali neglizhence, kur drejtonte Policinë e Korçës.
Pasi kreu i ri i Policisë së Shtetit i besoi Ahmetit postin e drejtorit të Policisë së Fierit, një vend i cili kishte mbetur vakant nga vetë Hita, tashmë ai ka marrë në krah të tij, si zv.drejtues në atë institucion, ish-vartësin Taulant Gjoka.
Me firmën e kryepolicit, nga mesi i kësaj jave, Gjoka do të jetë zv.drejtor për Rendin në Drejtorinë e Fierit, duke u rikthyer në varësi të Erion Ahmetit.
Ky i fundit ka qenë disa vite më parë shef i Komisariatit të Policisë Rrugore në Tiranë. Ndërsa Taulant Gjoka ka qenë Komandant i Trafikut të kryeqytetit, një pozicion në varësi direkte të Ahmetit.
Tashmë, pas disa vitesh, dyshja rikthehen bashkë, pas disa peripecive që ka kaluar në karrierën e tij Erion Ahmeti.
Në vitin 2021, u “degdis” në një rreth verior nga ish-kryepolici Gledis Nano, pas skandaleve të një pas njëshme me lejimin e qarkullimit të betioniereve në çdo aks të kryeqytetit dhe në çdo orë të ditës. Për shkak të “tolerancës” së tij të tepruar për automjetet e rënda, kolegët e etiketuan si “Erion Betonieri”.
Në qetësi dhe pa shumë zhurmë, Erion Ahmeti siguroi fijet e duhuar me ish-kryepolicin, Ilir Proda. Ky e emëroi fillimisht drejtor në Policinë e Elbasanit dhe më pas i besoi Drejtorinë e Policisë së Korçës.
Në momentin që Erion Ahmeti dukej më i fortë se kurrë, pasi kishte në krah Ilir Prodën, ishte ky i fundit që e shkarkoi me zhurmë nga detyra, pasi neglizhoi një përplasje të fortë në zonën e Devollit.
Erion Ahmeti qëndroi për disa muaj në hije, në një zyrë në Drejtorinë e Përgjithshme të Policisë, në pritje të ndonjë rasti tjetër për promovim. Dhe, ai rast erdhi shumë shpejt. Në Mars 2026, kryeministri Edi Rama emëroi Skënder Hitën në postin e Drejtorit të Përgjithshëm të Policisë.
Ndër lëvizjet e para që realizoi Hita ishte pikërisht emërimi i Erion Ahmetit në krye të Policisë së Fierit. Ahmeti nuk vonoi dhe krijoi menjëherë “grupin e tij”, përfshirë ish-bashkëpunëtorin e ngushtë, Taulant Gjoka.
LEXO EDHE:
Policia “ngrihet” në tjetër nivel, Skënder Hita zëvendëson veten me Erion Ahmetin (betonieren)
Kryepolici i ri përballë betoniereve të oligarkëve që mbajnë në punë Erion Ahmetajn
