Këngëtarja shqiptare me famë ndërkombëtare Dua Lipa po përflitet se mund të kurorëzojë dashurinë e saj në Palermo, ndërsa spekulimet për një dasmë luksoze në Itali po marrin gjithnjë e më shumë vëmendje. Megjithatë, deri më tani nuk ka asnjë konfirmim zyrtar nga artistja apo përfaqësuesit e saj.
Sipas raportimeve të mediave italiane, hoteli historik Villa Igiea dyshohet se është rezervuar për një event të rëndësishëm, ndërsa data e mundshme e ceremonisë përflitet të jetë mes 5 dhe 7 shtatorit. Gjithashtu, prania e një planifikueseje të njohur eventesh ka shtuar dyshimet se mund të bëhet fjalë për një dasmë të madhe.
Zërat nisën të qarkullojnë pasi artistja u pa në shoqërinë e Alessandra Grillo, një nga organizatoret më të njohura të eventeve në Itali, e cila ka firmosur disa nga ceremonitë më prestigjioze në vend. Ky detaj u interpretua si një tregues i mundshëm për përgatitje të rëndësishme personale.
Ndërkohë, vetë Palermo duket se është përfshirë në atmosferën e këtyre spekulimeve, me rrjetet sociale dhe mediat lokale që e trajtojnë mundësinë e një dasme si një zhvillim të mundshëm, edhe pse mungojnë prova konkrete.
Lidhja e këngëtares me qytetin sicilian nuk është e rastësishme. Gjatë verës së vitit 2025, ajo vizitoi Palermon së bashku me partnerin e saj, aktorin britanik Callum Turner. Çifti eksploroi disa nga monumentet më të rëndësishme, si Kapela Palatine dhe Katedralja e Palermos, shëtiti përgjatë Via Maqueda dhe shijoi kuzhinën tradicionale të rajonit.
Pas kësaj vizite, Dua Lipa ndau disa momente në rrjetet sociale, duke e përshkruar qytetin me fjalët “Palermo in my heart”, një shprehje që reflekton lidhjen e saj të veçantë me këtë destinacion. Më vonë, ajo përmendi përvojën edhe gjatë një koncerti, duke veçuar veçanërisht gastronominë siciliane.
Dua Lipa dhe Callum Turner janë në një lidhje që prej vitit 2024, ndërsa e bënë publike marrëdhënien e tyre në vitin 2025. Aktori britanik është gjithashtu një nga emrat që përfliten për rolin e ardhshëm të James Bond, çka ka rritur edhe më shumë interesin mediatik rreth çiftit.
