Lufthansa ka njoftuar anulimin e rreth 20 mijë fluturimeve me distanca të shkurtra deri në muajin tetor, si pjesë e një strategjie për të ulur kostot e rritura ndjeshëm të karburantit për avionë (kerozen).
Sipas kompanisë gjermane, çmimi i karburantit është dyfishuar (madje dhe pak më tepër) për shkak të konfliktit në Gjirin Persik dhe mbylljes së Ngushticës të Hormuzit, një nyje e rëndësishme për transportin global të naftës.
Këto fluturime të anuluara përfaqësojnë rreth 40 mijë tonë metrikë karburant të kursyer. Lufthansa ka bërë të ditur se reduktimet prekin kryesisht operimet e kompanisë rajonale CityLine, e cila është pjesë e grupit dhe për të cilën është planifikuar edhe mbyllje graduale deri në vitin 2027, por që tani po përshpejtohet.
Kompania thekson se këto ndryshime janë pjesë e një riorganizimi më të gjerë të rrjetit evropian, i cili po zbatohet në të gjitha qendrat kryesore të grupit si Frankfurt, Mynih, Cyrih, Vjenë, Bruksel dhe Romë. Sipas njoftimit, tashmë janë anuluar rreth 120 fluturime ditore me efekt deri në fund të majit dhe pasagjerët që kanë pronotuar janë njoftuar.
Megjithatë, Lufthansa sqaron se këto masa nuk ndikojnë në programin e përgjithshëm të fluturimeve të të gjitha kompanive të grupit, por vetëm në operimet e CityLine. Kompania shton se për sezonin veror parashikohet furnizim relativisht i qëndrueshëm me karburant dhe se po përdor masa mbrojtëse financiare, përfshirë kontrata dhe blerje paraprake të karburantit.
Ndërkohë, situata po monitorohet edhe në nivel evropian. Ministrat e transportit të BE-së po diskutojnë masa për të shmangur mungesën e karburantit për avionë, pasi Agjencia Ndërkombëtare e Energjisë ka paralajmëruar se rezervat në Evropë mund të zgjasin më pak se gjashtë javë. Mes opsioneve që po shqyrtohen janë përdorimi i karburanteve alternative nga SHBA-të, fleksibilizimi i rregullave për furnizimin jashtë BE-së dhe ndryshime në rregullat e slot-eve aeroportuale.
Edhe kompani të tjera ajrore kanë nisur reduktime të ngjashme: SAS, KLM, Delta Air Lines, United Airlines, Cathay Pacific, Air New Zealand dhe të tjera kanë njoftuar shkurtime në programet e fluturimeve për të përballuar rritjen e kostove./ Corriere Della Sera
