Këshilli Kombëtar i Territorit vendosi të shfuqizojë lejen e ndërtimit për Embassy Tower, kullën 47 katëshe ngjitur me ambasadën amerikane.
E parashikuar për t’u ndërtuar nga biznesmeni vlonjat Fatmir Hanxhari, i cili dyshohej se në këtë rast ishte thjesht një prestanome, kulla 47 kate tashmë do të mbetet përfundimisht në letër, teksa KKTU ka vendosur shfuqizimin e lejes së saj në mbledhjen e fundit.
Sekretaria Teknike e KKT nuk ka dhënë arsye për shfuqizimin e lejes. Ndaj nuk dihet nëse anullimi i ndërtimit të përbindëshit 47 kate është i lidhur me hetimet e SPAK, apo me çështje sigurie duke qenë se ngrihej ngjitur me ambsadën e SHBA-ve duke kompromentuar jo pak sigurinë e selisë diplomatike më të rëndësishme në vend.
Por teksa një përbindësh rrëzohet, një tjetër ngrihet fuqishëm. Në po të njëjtën mbledhje, KKTU ka miratuar lejen e ndërtimit për ngritjen e një kulle 45 kate në Bllok, tek ish Vodafoni. Përfituesi i lejes është Roen Company, e cila zotërohet nga biznesmeni Rreoland Jegeni.
I shfaqur si biçim opozitari dhe përfitues i një koncesioni në qeverinë e Partisë Demokratike, Jegeni tashmë duket se ka gjetur lidhjet edhe me qeverinë duke arritur të shtijë në dorë leje për kullë 45 kate në zemër të Tiranës, në një nga zonat më të ngarkuara me ndërtime.
Dikur në takimet e organizuara nga opozita zoti Jegeni ankohej për klimën e biznesit dhe qeverinë, por tashmë me sa duket klima është përmirësuar edhe për të.
Zoti Jegeni duke u ankuar ne takimet e Bashes
Rreoland Jegeni është pronari në letra i koncesionit të barrëve siguruese, një biznes me normë fitimi deri në 80 për qind i dhënë gjatë qeverisjes së partisë Demokratike, për të cilin më vonë ka patur akuza brenda llojit mes demokratëve.
Ngritja e përbindëshit 45 katësh në Bllok është thika e radhës që i ngulet zemrës së Tiranës, një nga zonat me densitetin më të lartë të ndërtimeve dhe popullsisë në Europë./ kapitali.al
