Dy të rinj janë arrestuar nga Policia, në zonën e Kamzës pasi janë kapur me armë zjarri.
Sipas njoftimit zyrtar, gjatë ndërhyrjes në fshatin Çekrezë, policia i ka bërë shenjë ndalimi një motomjeti ku udhëtonin shtetasit A. K., 23 vjeç dhe A. A., 18 vjeç, të dy banues në Kamëz.
Drejtuesi i mjetit nuk i është bindur urdhrit të efektivëve dhe është larguar me shpejtësi, duke tentuar t’i shmanget kontrollit.
Pas ndjekjes nga policia, të dy të rinjtë janë kapur dhe vënë në pranga. Gjatë kontrollit në motomjet, efektivët kanë gjetur një armë zjarri pistoletë me municion luftarak, si dhe një maskë, të cilat janë sekuestruar në cilësinë e provës materiale.
Po ashtu gjatë kontrollit në banesës e 23-vjeçarit, janë zbuluar edhe një armë gjahu dhe një armë sportive, duke e çuar në tre numrin total të armëve të sekuestruara.
Ndërkohë, pasagjeri 18-vjeçar është arrestuar për veprën penale “moskallëzim krimi”.
Materialet procedurale i janë referuar Prokurorisë së Tiranës për veprime të mëtejshme proceduriale.
